Krıptovalıýta arqyly pıramıdaǵa aqsha salǵandardyń 250 mln teńgesi qaıtaryldy

ASTANA. KAZINFORM — Qarjylyq monıtorıng agenttigi TMD keńistiginde alǵashqy bolyp qazaqstandyqtardan qarjy pıramıdasyna krıptoaktıvter arqyly zańsyz tartylǵan 250 mln teńgeni shetelden qaıtardy. 

Álemdik tájirıbede mundaı nátıjege birneshe el ǵana qol jetkizgen.

Agenttik zamanaýı IT quraldardy paıdalana otyryp, 2,5 aı ishinde qazaqstandyqtardyń qarajatyn krıptovalıýtaǵa tartqan «Eolus» joǵary tehnologııalyq qarjy pıramıdasyn joıdy.

Elimizdiń 12 óńirinde (Almaty, Astana, Shymkent, Pavlodar, Óskemen, Aqtóbe, Atyraý, Qyzylorda, Oral, Kókshetaý, Jetisý, Túrkistan) 2,5 myńǵa jýyq salymshy tartyldy. 

Elordalyq uıymdastyrýshynyń múlki tárkilenip, 6 jylǵa bas bostandyǵynan aıyryldy.

Qylmystyń izin jasyryp, jınalǵan qarajatty kedergisiz ıemdený maqsatynda, pıramıdany uıymdastyrýshylar salymshylardan túsken búkil qarjylyq aǵyndardy kóptegen tranzıttik krıpto ámııandar arqyly jasyrǵan.

Agenttik qyzmetkerleri zamanaýı blokcheın-analıtıkanyń quraldaryn paıdalana otyryp, barlyq tranzaktsııany anyqtap, qylmystyq kirister aǵylǵan negizgi ámııandardy tapty.

Urlanǵan qarajat agenttiktiń arnaıy shotyna aýdarylyp, odan ári jábirlenýshi azamattarǵa kelgen zalaldy óteý úshin paıdalanylatyn bolady.

QMA qylmystyq aktıvterdi qaıtarý jáne basqa da alaıaqtyq jobalar boıynsha osy praktıkany qoldanýdy josparlap otyr.

Agenttik azamattardy passıvti kiris pen artyq paıdany ýáde etetin kúmándi ınvestıtsııalyq jobalarǵa senbeýge shaqyrady.

Kompanııanyń senimdiligin Baiqa, piramida! boty arqyly teksere alasyz.