Krıptobırjalardyń saýda aınalymy 30 eseden astam ósti - Jasandy ıntellekt mınıstrligi
ASTANA. KAZINFORM – Tsıfrlyq maınıngke qatysty birqatar shekteý alyndy. Bul týraly Úkimet otyrysynda Jasandy ıntellekt jáne tsıfrlyq damý vıtse-mınıstri Ǵızzat Baıtursynov málim etti.
- 2022 jyly «Astana» halyqaralyq qarjy ortalyǵymen jáne qarjy retteýshilerimen birlesip krıptobırjalardy retteý boıynsha pılottyq joba iske qosyldy. Osy jumystyń nátıjesinde Qazaqstanda krıptobırjalardyń zańdy ári ashyq jumys isteýine qajetti retteý júıesi qalyptasty. Búginde Binance, Bybit, BigOne jáne WhiteBit sııaqty iri krıptobırjalar osy júıe aıasynda jumys isteıdi. Nátıjesi naqty kórsetkishterden kórinedi. 2023 jylmen salystyrǵanda 2025 jyly krıptobırjalardyń saýda aınalymy 30 eseden astam ósti. Paıdalanýshylar sany da 215 myń adamǵa deıin jetip, 4 eseden astam artty. Bul azamattardyń zańdy jáne qolaıly jaǵdaı jasalǵan kezde qazaqstandyq platformalardy tańdaýǵa daıyn ekenin kórsetedi, - dedi Ǵ. Baıtursynov.
Onyń aıtýynsha, sońǵy eki jylda tsıfrlyq aktıvter salasyndaǵy zańnama edáýir jańartyldy. 2025 jylǵy qarashada tsıfrlyq maınıngke qatysty birqatar shekteý alyndy.
– Óndirilgen tsıfrlyq aktıvterdiń 75%-yn «Astana» halyqaralyq qarjy ortalyǵy bırjalary arqyly mindetti satý talaby joıyldy. Maınerlerge konteınerlik sheshimderdi paıdalanýǵa ruqsat berildi. Sondaı-aq maınerlerdiń tek bir ǵana qyzmet túrimen aınalysý talaby joıyldy. 2026 jylǵy qańtarda tsıfrlyq aktıvterdiń jańa túrlerin retteý engizildi. Oǵan tsıfrlyq qarjylyq aktıvter, steıblkoındar, krıptoprovaıderler jáne platforma operatorlary kiredi. Alǵashqy kezeńde naryqty retteý mindeti sheshildi. Qazir negizgi basymdyq ony damytýǵa berilip otyr, - dedi vıtse-mınıstr.
Buǵan deıin Qazaqstanda krıptoamnıstııa men maınıngke qatysty jańa erejeler usynylǵanyn jazǵan edik.
