Krıptoaıyrbastaý arqyly 155 mln teńge zańsyz tabys tapqan Oral turǵyny sottaldy
ORAL. KAZINFORM — Batys Qazaqstan oblysynda zańsyz kásipkerlik qyzmetpen, atap aıtqanda, qamtamasyz etilmegen tsıfrlyq aktıvterdiń aınalymymen baılanysty is boıynsha Oral qalasynyń turǵynyna qatysty qylmystyq iske núkte qoıyldy.
BQO boıynsha ekonomıkalyq tergep-tekserý departamentiniń baspasóz qyzmetinen málim etkenindeı, er adam 2022 jyldyń maýsym aıynan 2025 jyldyń shilde aıyna deıin Binance krıptovalıýta bırjasynyń P2P platformasy arqyly USDT krıptovalıýtasyn satyp alý jáne satý operatsııalaryn júıeli túrde júzege asyrǵan. Ol bul qyzmetti «Astana» halyqaralyq qarjy ortalyǵynan tıisti lıtsenzııa almaı júrgizgen, al bul Qazaqstan Respýblıkasy zańnamasynyń talaptaryna qaıshy keledi.
Tergeý barysynda kúdiktiniń atalǵan kezeńde 155,2 mln teńge kóleminde tabys tapqany belgili boldy.
Sonymen qatar zańsyz krıptoaıyrbastaý qyzmetiniń Imrat Group qarjylyq pıramıdasy qyzmetimen baılanysty bolǵany anyqtaldy.
Qarjylyq pıramıdany uıymdastyrýshylar salymshylardyń aqshalaı qarajatyn krıptovalıýtaǵa aıyrbastap, keıin ony shemaǵa qatysýshylardyń krıptoámııandaryna aýdarý úshin atalǵan er adamdy paıdalanǵan.
Naqty aıtqanda, sottalýshy arqyly qarjylyq pıramıdanyń birneshe salymshylarynyń 82,5 mln teńgeden astam qarajaty krıptovalıýtaǵa aıyrbastalyp, keıin tıisti krıptoámııandarǵa aýdarylǵan. Aıyrbastaý operatsııalaryn júrgizgeni úshin ol tsıfrlyq aktıvterdi satyp alý jáne satý baǵamdarynyń aıyrmasynan tabys alyp otyrǵan.
— Qylmystyq isti sotta qaraý nátıjesinde Oral qalasynyń turǵyny kináli dep tanyldy. Alaıda amnıstııa týraly zańnyń kúshine enýine baılanysty ol qylmystyq jazadan bosatyldy. Departament azamattarǵa tsıfrlyq aktıvtermen operatsııalar júrgizý kezinde saq bolý jáne tek lıtsenzııasy bar operatorlardyń qyzmetterin paıdalaný kerektigin eske salady. Taǵy bir eskeretin jaıt, qamtamasyz etilmegen tsıfrlyq aktıvterdi aıyrbastaý qyzmeti lıtsenzııalanýǵa jatady. Zańnamaǵa engizilgen ózgeristerge sáıkes, qamtamasyz etilmegen tsıfrlyq aktıvterdi aıyrbastaý operatorynyń qyzmetin júzege asyrý úshin Ulttyq banktiń tıisti lıtsenzııasyn alý qajet. Lıtsenzııasyz aıyrbastaý operatsııalaryn júzege asyrý zańnama talaptaryn buzý bolyp tabylady jáne zańda kózdelgen jaýaptylyqqa soqtyrady, — dep habarlady vedomstvodan.
Eske sala keteıik, budan buryn qarjy pıramıdasyn qurǵan Oral qalasynyń eki turǵyny 5 jylǵa sottalǵanyn jazǵan edik.
