Krıokonservatsııa — sanaly ana bolýdy josparlaýdyń senimdi sheshimi

ASTANA. KAZINFORM — Krıokonservatsııa degendi estýińiz bar ma? Medıtsınadaǵy mańyzdy termınge qatysty sala mamany pikir bildirdi.

— Krıokonservatsııa ádisi - 196 gradýs aıazda suıyq azotta analyq uryqty nemese atalyq uryqty nemese embrıondy qatyryp qoıý. Ol endi qazirgi ǵylymnyń bir jetistigi. Burynǵy kezde ondaı múmkindik bolmaǵan. Osydan 15-20 jyl buryn eń bir tıimdi100 paıyz nátıje beretin ádis oılap shyǵarylǵan. Bul kóbinese EKO jasaıtyn kezde mańyzdy, — deıdi professor Saltanat Baıqoshqarova.

Maman pikirinshe, kúıeýge shyqpaı júrgen qyzdardyń kóbi sol ádiske júgingisi keledi eken. Ásirese, 30-35-ten asqan názik jandylardan ótinish kóp túsedi.

— Biraq, ol krıokonservatsııa ádisi analyq uryqty alyp, alǵashqyda garmondyq stımýlıatsııa jasalady. Sodan keıin ýltra dybyqtyq zertteýdiń kómegimen ınemen tesip alamyz. Sodan keıin jaqsy, sapaly analyq uryqtardy qatyryp qoıamyz. Er adamda atalyq uryqty qatyrýǵa bolady. Er adamnyń uryǵyn qatyrý óte jeńil. Ol ádis burynnan qoldanylatyn. Al, áıeldiń uryǵyn qatyrý óte qıyn. Óıtkeni ol óte úlken jasýsha, — deıdi spıker.

Degenmen, Saltanat Baıqoshqarova barlyǵy tabıǵı jolmen bolǵany durys dep esepteıdi. Ol úshin jastar ýaqytyly úılenýi kerek.

— Men dál osy ádispen balaly bolyńdar dep úgittemeımin. Barlyǵy tabıǵı túrde bolǵany durys. Al, endi múldem amal joq bolsa, onda jasaýǵa bolady. 35-40-tan asqan soń uryqty qatyryp qoıýdyń keri áseri de bar. Uryqtyń sapasy nasharlaıdy. Bir balany dúnıege ákeli úshin 36-44 analyq uryqqa deıin kerek bolady. Ol ońaı sharýa emes, — dedi ol suhbat barysynda.