Krımınalıtettiń dinı ekstremıstermen qosylýy túzeý mekemelerindegi shıelenisti arttyrýda - QR Іshki ister mınıstri
ASTANA. 28 mamyr. QazAqparat - Krımınalıtettiń dinı ekstremıstermen qosylýy túzeý mekemelerindegi shıelenisti arttyrýda.
Bul týraly búgin Úkimette 2012-2015 jyldarǵa arnalǵan Qazaqstan Respýblıkasyndaǵy qylmystyq atqarý júıesin damytý baǵdarlamasynyń jobasyn tanystyrǵan QR Іshki ister mınıstri Qalmuhanbet Qasymov málim etti.
«Kollonııalardaǵy krımınogendi ahýal, ásirese sońǵy jyldary barynsha alańdaýshylyq týyndatyp otyr. Bul jerde jasalatyn qylmystar sany qysqarar emes. Máselen, 2010 jyly Aqtaýda 20-dan astam sottalýshy toptasyp qarýmen qashty. Ótken jyly Balqash kolonııasynda toptasyp qarýmen qashyp shyǵýǵa áreket jasaldy. Kollonııalardaǵy shıelenistiń artýynyń basty sebepteriniń biri krımınalıtterdiń dinı ekstremıstermen qosylýy bolyp otyr», - dedi mınıstr.
Onyń paıymynsha, qylmystyq-atqarý júıesi Ádilet mınıstrliginiń qaraýynda bolǵan kezeńde tutqyndardy ustaý rejimi álsiregen. Sondaı-aq ishki tártip erejeleri buzýǵa, mekeme ákimshiligine baǵynbaýǵa, shekteý qoıylǵan zattardy kolonııaǵa erkin alyp kirýge jol berilgen.
«Biz qylmystyq-atqarý júıesin qaramaǵymyzǵa alǵannan keıin jańa baqylaý qyzmetin qurdyq. Baqylaýdyń kúsheıýi nátıjesinde ótken jyly 11 mln. teńge, 10 myń uıaly telefon, 11 tonna ishimdik, shamamen 130 keli esirtki zattary jáne 12 myńnan astam shanyshqyly-keskish zat alyndy», - dedi Q.Qasymov.
