Krımınalıstıka úlken jaýapkershilikti qajet etedi — qyzylordalyq polıtseı
QYZYLORDA. KAZINFORM — Qyzylorda qalalyq polıtsııa basqarmasynyń jedel-krımınalıstka bóliminiń krımınalısi Erqanat Bolatov ishki ister salasynda on jyldan astam ýaqyttan beri qyzmet atqaryp keledi. Sońǵy jeti jyldan beri krımınalıstıka salasynda jumys jasaıdy.
1994 jyly 9 qarashada Qyzylorda qalasynda dúnıege kelgen Erqanat «Aqmeshit» gýmanıtarlyq-tehnıkalyq ınstıtýtynda zańger mamandyǵy boıynsha bilim aldy.
Alǵashqy eńbek jolyn 2014 jyly Qyzylorda qalasy polıtsııa basqarmasynyń patrýldik polıtsııa batalonynda bastaǵan.
— Bizdiń otbasynda polıtsııada eńbek etken adam joq. Al ákemniń dosy sol salada jumys jasady. Ol kisi úıge kelgende áńgimesine qulaq salamyn. Keıinnen polıtsııa jaıynda derekter jınaýǵa mán berdim. Joǵary oqý ornynda júrgende bul jóninde kóbirek bilimimdi tolyqtyrdym. Keleshekte osy sala mamany atanýdy aldyma maqsat etip qoıdym. Oqyp júrgende tıisti mekemelerge is-tájirıbeden ótýge baratyn edik. Sonda arnaıy quraldarmen jabdyqtalǵan chemodandy kózimiz jıi shalatyn», — deıdi Erqanat.
Jas jigit osylaısha krımınalıstıka salasynyń qyr-syryna qanyǵýǵa tyrysty.
Keıbir ýaqytta túıindi máseleniń tarqaýyn sol mamandar sheship jatatyn edi. Osynyń barlyǵy oǵan erekshe áser etti.
— Polıtsııa salasyna qyzmetke kelgende de maǵan ońaıǵa soqqan joq. Patrýldik beketterde júrgende krımınalıstıkanyń qyr-syryn birte-birte úırene bastadym. Jedel tergeý tobynyń isine belsene aralastym. Oǵan tereń bilimniń qajettigin túsindim. Bul saladaǵy tájirıbeli mamandardan aqyl-keńes aldym. Qylmystyq oqıǵa ornynda árbir aıǵaqty súzgiden ótkizýge mán berdim. Krımınalıster jurttyń barlyǵy bile bermeıtin chemodandy arqalap júredi. Olardyń kóbisi turmysta qoldanyla bermeıdi. Máselen, ǵylymmen ushtasqan untaqty qyldy qalammen meńgerý úlken jaýapkershilikti talap etedi, — deıdi ol.
Erqanat 2017 jyldyń 5 shildesinde Qyzylorda qalalyq polıtsııa basqarmasynyń jedel-krımınalıstıka bóliminde eńbek jolyn jalǵastyrdy.
Bólimde aǵa krımınalıst qyzmetin atqaratyn tájirıbeli mamandar oǵan aqyl-keńesin aıtty.
— Ras, erekshe tústi keýdeshe kıip maman retinde chemodan asynyp júrý maǵan birden buıyra qoıǵan joq. «Qylmys jasyryndy aılaǵa qurylady, aılany áshkereleý úshin amal kerek, al amalyn tabý úshin ne kerek» dedi olar. Krımınalıstıkaǵa qatysty kóptegen kitaptardy oqýǵa keńes berdi. Olar men úshin sheshýi joq teńdeý sekildi kórindi. Sol kitaptardy oqyp shyqtym. Ózime qajetti kóptegen málimetterge keziktirdim. Krımınalısttiń úsh qarýy bar. Aldymen adamgershilik bolsa, ekinshisi — bilim, úshinshisi — qyzmetine degen adaldyǵy. Júktelgen zor mindettiń mańyzdylyǵyn túsinemiz», — dep áńgimesin tolyqtyrdy ol.
