Krımınalıstıka ǵylymmen ushtasyp jatady - Erqanat Bolatov

QYZYLORDA. QazAqparat - Polıtsııa qyzmetinde krımınalıstıka salasynyń alatyn orny erekshe. Qylmysty ashý isinde bul qyzmet úlken jumys atqarady. Qazirgi tańda krımınalıst mamandyǵyna qyzyǵatyn jastar qatary kóbeıip keledi. Solardyń biri - Erqanat Bolatov Qyzylorda qalalyq polıtsııa basqarmasynyń jedel-krımınalıstka bóliminde aǵa krımınalıst qyzmetin atqarady. Jas krımınalıst QazAqparat tilshisine qyzyǵy men qıyndyǵy qatar júretin kásibi jóninde aıtyp bergen edi.

«Bizdiń otbasynda polıtsııa qyzmetinde eńbek etken adam joq. Al ákemniń dosy sol salada jumys jasady. Ol kisi kelgende qasyna otyramyn. Áńgimesine qulaq salamyn. Keıin ol jaıynda derekter jınaýǵa mán berdim. Joǵary oqý ornynda júrgende syry kóp sala jóninde bilimimdi tolyqtyrdym. Keleshekte osy sala mamany atanýǵa daıyndalyp júrdim. Oqyp júrgende tıisti mekemelerge is-tájirıbeden ótýge bardyq. Sonda arnaıy quraldarmen jabdyqtalǵan chemodandy kózimiz jıi shalatyn», - dedi Erqanat Bolatov.

Jas jigit osylaısha krımınalıstıka salasynyń qyr-syryna qanyǵýǵa tyrysty. Keıbir ýaqytta túıindi máseleniń tarqaýyn sol mamandar sheship jatatyn edi. Osynyń barlyǵy oǵan erekshe áser etti.

«Qıyn mamandyq qoı. Keıin polıtsııa salasyna qyzmetke kelgende de maǵan ońaıǵa soqqan joq. Patrýldik beketterde júrgende krımınalıstıkanyń qyr-syryn birte-birte úırene bastadym. Jedel tergeý tobynyń isine belsene aralastym. Oǵan tereń bilimniń qajettigin túsindim. Bul saladaǵy tájirıbeli mamandardan aqyl-keńes aldym. Olar qoldaý bildirdi. Osylaısha salanyń qıyn soqpaǵyna túsip kettik. Qylmystyq oqıǵa ornynda árbir aıǵaqty súzgiden ótkizýge mán berdim», - dedi ol.

Krımınalıster jurttyń barlyǵy bile bermeıtin chemodandy arqalap júredi. Olardyń kóbisi turmysta qoldanyla bermeıdi. Máselen, ǵylymmen ushtasqan untaqty qyldy qalammen meńgerý úlken jaýapkershilikti talap etedi.

«Men 2017 jyldyń 5 shildesinde Qyzylorda qalalyq polıtsııa basqarmasynyń jedel-krımınalıstıka bóliminde eńbek jolymdy bastadym. Ras, erekshe tústi keýdeshe kıip maman retinde chemodan asynyp júrý maǵan birden buıyra qoıǵan joq. Bólimde aǵa krımınalıst qyzmetin atqaratyn tájirıbeli mamannyń biri maǵan aqyl-keńesin aıtty. «Qylmys jasyryndy aılaǵa qurylady, aılany áshkereleý úshin amal kerek, al amalyn tabý úshin ne kerek» dep aldyma krımınalıstıka salasyna qatysty tom-tom bolǵan kitaptardy qoıdy. Olar men úshin sheshýi joq teńdeý sekildi kórindi. Sol kitaptardy oqyp shyqtym. Ózime qajetti kóptegen málimetterge keziktirdim», - dedi ol.

San alýan oqý-jattyǵý kezinde jas mamanǵa kóptegen qıynshylyqtarǵa jolyqty. Krımınalıstıka álipbıin júıeli zerttedi. Qylmys oryn alǵan jerdegi árbir aıǵaq zat bir-birimen qylmen bekitilgendeı ushtasyp turady. «Ony úzip alsańyz izdiń joıylyp ketedi. Ol qylmystyq iske keri áserin berý múmkin. Sondyqtan jas maman retinde tájirıbe jınaqtaý ońaıǵa soqqan joq.

«Bıyl elimizde krımınalıstıka salasyna júz jyl tolǵaly otyr. Ol alǵashqyda qylmyskerdiń foto-sýretimen kartoteka quraýdan bastaý alǵan edi. Qazir bul sala mańyzdy bolyp sanalady. Krımınalıstka salasynyń ómirsheńdigi sonshalyqty ol zaman aǵymyndaǵy árbir jańalyqpen ushtasyp jatady», - dedi Erqanat Bolatov.