Krımınalıster tártipsizdikten keıin 15 myńnan astam tergeý júrgizdi - ІІM

NUR-SULTAN. QazAqparat – Іshki ister mınıstrliginiń krımınalısteri qańtar oqıǵasyna qatysty 15 myńnan astam tergeý áreketin júrgizdi. Bul týraly ІІM tergeý departamentiniń bastyǵy Sanjar Ádilov aıtty, dep habarlaıdy QazAqparat tilshisi.

«Barshamyzǵa málim, tártipsizdik kezinde Almaty qalasy eń kóp zardap shekti. Osyǵan baılanysty jáne kásipkerlerdiń ótinishin eskere otyryp, óńirlik polıtsııa departamentterinen jedel-tergeý jáne krımınalıstıka bólimshe qyzmetkerleri qosymsha tartyldy. Nátıjesinde barlyq nysandardy tekserýdi qysqa merzimde aıaqtap, oqıǵa ornyn, zaqymdardy tirkep, qajetti zattaı dáleldemelerdi aldyq», - dedi ol Ortalyq kommýnıkatsııalar qyzmetindegi brıfıng barysynda.

Onyń atap ótýinshe, qazirgi ýaqytta ІІM krımınalısteri alynǵan iz boıynsha qylmyskerlerdiń jeke basyn anyqtap jatyr.

«Tergeýshiler 15 myńnan astam tergeý júrgizdi. Onyń ishinde jábirlenýshilerden, kýálardan jáne kúdiktilerden jaýap alý, olardy bettestirý, tekserýler, tintý jáne basqa da is-sharalar bar. Tergeý organdaryna dáleldeme jınaýǵa jáne quqyq buzýshylardy ustaýǵa kómektesetin azamattarǵa erekshe alǵys aıtqym keledi. Mysaly, Almaty oblysy eldi mekenderiniń birinde turǵyndar urlanǵan qarýdyń altaýyn satý áreketiniń jolyn kesip, polıtsııaǵa tapsyrdy. Atalǵan fakti boıynsha sotqa deıingi tergeý bastaldy jáne kúdiktiler ustaldy. Olardyń Almaty qalasy áýejaıynyń ǵımaratyndaǵy saýda núktelerin tonaýǵa qatysy bar ekeni anyqtaldy», - dedi Sanjar Ádilov.