«Krımınaldyq chtıvo» fılminiń akteri Pıter Grın qaıtys boldy

ASTANA. KAZINFORM — «Maska» jáne «Krımınaldyq chtıvo» fılmderindegi rólderimen tanymal amerıkalyq akter Pıter Grın Nıý-Iorktegi páterinen óli kúıinde tabyldy. Ol 60 jasta bolǵan, dep habarlaıdy TASS.

— Pıter edende etpetinen jatqan, beti jaraqattanǵan, aınalanyń bári qan bolǵan, — dep málimdedi aty-jónin jarııalamaýdy suraǵan akterdiń kórshisi New York Daily News gazetine.

Qazirgi tańda ólimniń naqty sebebi jáne zorlyq-zombylyq belgileri resmı túrde rastalǵan joq. Alaıda New York Daily News basylymynyń Nıý-Iork polıtsııasyndaǵy derekkózi akterdiń páterinen tabylǵan keıbir aıǵaq Grınniń ólimine qalanyń ırlandııalyq qylmystyq toptarynyń qatysy bolýy múmkin ekenin joqqa shyǵarmaıtynyn aıtqan.

Gazet málimetinshe, Pıter Grın jaqyn ýaqytta ókpe mańyndaǵy qatersiz isikti alyp tastaý úshin operatsııa jasatýy tıis bolǵan.

Pıter Grın 1965 jylǵy 8 qazanda Nıý-Djersı shtatynyń Montkler qalasynda dúnıege kelgen. Ol Nıý-Iorktegi Lı Strasberg atyndaǵy teatr jáne kıno ınstıtýtyn bitirip, biraz ýaqyt qalalyq teatrda óner kórsetken. Akterlik jolyn «Hardboll» teleserıalyndaǵy (1989–1990) jáne «Zańnyń buljymas kúshi» (Law of Gravity, 1992) fılmindegi epızodtyq rólderden bastaǵan.

1990-jyldary ol «Krımınaldyq chtıvo» (Pulp Fiction, 1994), «Maska» (The Mask, 1994), «Brıllıantty polıtseı» (Blue Streak, 1999) jáne «Baskeser» (The Bounty Hunter, 2010) fılmderindegi rólderi arqyly keńinen tanymal boldy.

Eske sala keteıik, 5 jeltoqsanda japon tekti amerıkalyq akter Kerı-Hıroıýkı Tagava 76 jasynda ómirden ótkeni habarlandy.