Kresloǵa «otyrǵyzyp» ketti: almatylyq kompanııa zeınetkerdiń atynan nesıe rásimdegen
ÓSKEMEN. KAZINFORM – Múgedektigi bar Berdibek Bitibaevqa áldebir kompanııa massaj jasaıtyn kreslony syıǵa tartamyz dep, keıin nesıege rásimdetken. Aldanyp qalǵan ol ne taýardy qaıtara almaı, ne aqshany tóleı almaı dal. Kazinform tilshisi máseleniń mánisine úńilip kórgen edi.
«Kózińizdi tekserip, kózildirik beremiz»
Óskemen qalasynda turatyn Berdibek Bitibaev – aı saıynǵy zeınetaqysyna kún kórip, qalt-qult etip otyrǵan kóp qazaqtyń biri. Jasy 65-te. Bala kúninde bıikten qulaǵan onyń ІІІ toptaǵy múgedektigi bar.
«Ákemniń telefonyna habarlasqan beıtanys adam óziniń bir kompanııada jumys isteıtindigin aıtqan. Almatydan Óskemenge keletindikterin, kózin tegin tekserip beretindikterin, tipti kózildirik syılaıtyndyqtaryn jetkizedi. Tegin degen soń ol qýanyp, kelisilgen ýaqytta barǵan. Qaladaǵy meıramhanalardyń birinde ekinshi qabattaǵy keńseni jalǵa alǵan kompanııa qyzmetkerleri ákemdi qutty qonaqtaı qarsy alypty. Biraq kóz jaıyna qalyp, massaj jasaıtyn kreslony kórsete bastaǵan», - deıdi qyzy Madına Kárimova.
Onyń aıtýynsha, kompanııa mamandary áýelde ákesine massajerdi, jastyq pen kórpeni syıǵa tartatyndyqtaryn jetkizgen. Sálden soń ol úshin kreslony jeńildikpen satyp alý kerektigin alǵa tartqan.
«Eger qolda aqshańyz bolmasa nesıege rásimdep bere alamyz. Bankke barýdyń qajeti joq. Tek osynda qol qoısańyz jetkilikti. Aı saıyn 19 myń teńgege jýyq qana tóleısiz. Al kreslonyń sizdiń densaýlyǵyńyzǵa bereri mol. Aqshadan densaýlyq qymbat qoı» dep ákemniń basyn aınaldyryp, qol qoıǵyzyp alǵan. Ákem qujat jaǵynan múlde habary joq, ishin ashyp oqymaǵan. Kózi de durys kórmeıdi. Kózildirik beremiz degennen keıin baryp, nesıe arqalap keldi. «Tegin irimshik tek qaqpanda» dep beker aıtylmaǵan ǵoı. Biraq qyzyqtyń kókesi bul ǵana emes eken», - deıdi.
Arada bir aıǵa jýyq ýaqyt ótkende kompanııadan habarlasyp, «Nesıeni nege tólemeı jatyrsyz?» degen. Berdibek Bitibaev tólegenin aıtqan. Sol kezde kompanııa qyzmetkerleri onyń 63 myń teńge somasynda ekinshi nesıeni tóleýi tıistigin jetkizipti.
«Sóıtsek, álgiler bir emes eki nesıe alǵyzyp tastapty. Naqty somasyn aıtsaq, birinshisi – 18 850 teńge, ekinshisi – 63 333 teńge. Ákeme bul týraly múlde jaq ashpaı, aldap qol qoıǵyzady. Men olarǵa «Bulaı bolmaıdy! Taýarlaryńyzdy qaıtaryp alyńyzdar. Ashylmaǵan kúıi tur» dep edim, «Joq, taýardy tek 14 kún ishinde keri qaıtara alasyzdar. Ol merzim ótip ketken» dep jaýap berdi. Árbir qadamyn aldyn ala oılastyryp alǵan kompanııa qaıtarý merzimi ótkenin tosyp baryp ákeme habarlasty. Bul alaıaqtyq emeı nemene?!» - deıdi Madına Kárimova.
Ol polıtsııaǵa aryz túsirgenderin de jetkizdi. Biraq tártip saqshylary is qozǵaýdan bas tartqan.
«Siz satyp alý jáne satý kelisimshartyn jasasyp, qol qoıǵansyz. Qujatta nesıe týraly kórsetilgen», - delingen qalalyq PB Ertis polıtsııa bólimshesi bastyǵynyń mindetin atqarýshy A. Jumekenovtiń qoly qoıylǵan jaýap hatta.
Berdibek Bitibaev bizge «óziniń qol qoıǵany úshin ókinishtiń kúıigi kókiregin shoqtaı qarıtynyn, barlyǵy qyzynyń aıtqanyndaı bolǵanyn» rastaýdan basqa túk aıta almady. Qazirde aı saıyn alatyn zeınetaqysy – 92 myń teńge. 18 850-ge 63 333-di qossańyz 82 183 shyǵady.
«Nesıe tólesem azyq-túlikke, dári-dármekke, kommýnaldyq qyzmet pen basqa da shyǵyndarǵa qalǵan aqshany qalaı jetkizemin?» - deıdi kóńilin muń torlaǵan zeınetker.
Sotqa shaǵymdanýǵa quqyly
Qujattarmen muqııat tanysyp shyqtyq. Kompanııa ataýy – «Vip Events» JShS. Ornalasqan mekenjaıy – Almaty qalasy. Basqa qalalarda bólimsheleri joq. Massaj jasaıtyn kreslony Berdibek Bitibaevqa 1 210 000 teńgege satypty. Qujattardyń ishinde baılanys telefony da kórsetilgen. Soǵan habarlasyp kórdik. Alaıda birneshe kún boıy qońyraý múlde barmady. Madına Berdibekqyzynan kompanııamen qalaı baılanysyp júrgenin suraǵanymyzda:
«Olarǵa óziń habarlasa almaısyń. Qońyraý barmaıdy. Tek ózderi habarlasqan kezde ǵana sóılesemiz», - dep jaýap berdi.
Sodan soń agenttiktiń Almatydaǵy tilshileri kompanııanyń keńsesine baryp kórdi. Keńse rasymen bar eken. Seıfýllın kóshesinde oryn tepken saýda úıindegi keńsede birneshe adam otyrady. Alaıda olar bul suraqtarǵa múlde jaýap bere almaıtyndyqtaryn jetkizip, «osynda habarlasyńyz» dep uıaly telefon nómirin beredi. Ala sala qońyraý shaldym. Biraq telefondy kótergen er adam «ondaı kompanııany múlde bilmeıtinin, men nómirdi shatastyryp alǵanymdy» aıtty.
Osy rette, zańgermen de baılanysyp, mán-jaıdy baıandap kórgen edik.
«Zeınetkerlerge qysym kórsetip, aldap nemese jalǵan aqparat aıtyp qol qoıdyryp alǵan adam zań aldynda jaýap beredi. Sebebi, bul alaıaqtyq bolyp sanalady. Ol úshin jábirlenýshi adamdar turǵylyqty mekenjaılary boıynsha sotqa baryp, aryz jazýy tıis. Sotpen kinási dáleldense, Berdibek Bitibaevtyń atyna nesıe alǵan kompanııa oǵan moraldyq shyǵyn retinde somany tolyqtaı tólep berýge mindetti», - dep túsindirdi zańger Dıana Shakımova.
Berdibek Bitibaev dál osylaı isteıin dep otyr. Nesıeni tólemeı, kompanııa atyna sotqa shaǵym túsirmek. Oqıǵanyń ary qaraı qalaı órbıtini bizdiń nazarymyzda bolady.
