Kreşenıe rásiminde shomylý úshin 250 oryn arnaıy ázirlenedi

ASTANA. KAZINFORM – Tótenshe jaǵdaılar mınıstrligi kreşenıe shomylýy kezindegi qaýipsizdik erejelerin eske salady.

Bıylǵy daıyndyq aıasynda el óńirlerinde qys mezgilinde jappaı shomylý úshin 250 resmı oryn uıymdastyrylady. Qaýipsiz muz oıyqtarynyń tolyq tizimimen jergilikti atqarýshy organdar men TJ departamentterinen bilýge bolady.

− Jappaı shomylý oryndarynda azamattardyń qaýipsizdigin qamtamasyz etý úshin qutqarýshy súńgýirlerdi, shuǵyl den qoıý brıgadalaryn jáne polıtsııa qyzmetkerlerin qosa alǵanda, 2 395 qyzmetker kezekshilik etedi. Jedel den qoıý úshin 588 arnaıy kólik tartylady, - dep jazylǵan TJM habarlamasynda. 

TJM azamattardy shomylý kezinde qaýipsizdik erejelerin saqtaýǵa shaqyrady: oıyqqa túspes buryn densaýlyqtyń múmkindik beretinine kóz jetkizý kerek, sozylmaly aýrýlar men júrek problemalary bar adamdarǵa shomylýdan bas tartý usynylady.

Qaýipsiz shomylý úshin sýdyń temperatýrasy 0 gradýstan tómen bolmaýy kerek, qatty aǵyndar men tasty jerlerden aýlaq bolyp, tek arnaıy daıyndalǵan jáne qaýipsiz jerlerde shomylý kerek.

Jalǵyz súńgýden aýlaq bolyńyz, jaqyn jerde kómektesetin adamnyń bolǵany durys. Sýǵa túser aldynda bulshyqetti qyzdyryp, deneni sýyq sýǵa daıyndaý úshin jylytyńyz. Tez súńgýge tyrysyńyz jáne gıpotermııany boldyrmaý úshin sý astynda uzaq turmańyz. Shomylǵannan keıin tez oranyp, jyly kıim kıińiz.

Mınıstrliktiń habarlýynsha, ótken jyly jappaı shomylýǵa 72 myńnan astam adam qatysqan.

Buǵan deıin din ókilderi Kreşenıe merekesinde musylmandardyń sýǵa túsýi jóninde pikir bildirgen edi.

Sondaı-aq, SQO-da muzdyń juqalyǵyna baılanysty Esil ózeninde sýǵa shomylýǵa tyıym salyndy.