Kreşenıe merekesinde musylmandarǵa sýǵa túsýge bola ma – Din ókilderi jaýap berdi

TALDYQORǴAN. KAZINFORM — Pravoslav hrıstıandarynyń Kreşenıe merekesine musylmandardyń qatyspaǵany abzal. Islam dininde bul kúnáli áreket bolyp sanalady.

Ár jyl saıyn 18 qańtardan 19-yna qaraǵan túni dúnıejúziniń pravoslav hrıstıandary Kreşenıe merekesin atap ótedi. Bul din ókilderiniń senimi boıynsha, sol kúni sýǵa túsý arqyly adam kúnásinen tazarady. Al ıslam dini oǵan qurmetpen qaraýǵa shaqyrǵanmen, ımamdar musylmandardyń bul dástúrge, merekege qatyspaýyn eskertti.

- Islam dininde bizderge Allanyń elshisi Muhamed (s.ǵ.a.) bekitip bergen belgili bir mereke kúnderimiz bar. Ózge din ókilderiniń de merekesine eshqandaı qarsylyq pen kedergi jasaýymyzǵa bolmaıdy. Biraq olarmen birge toılaýǵa ruqsat etilmeıdi. Óıtkeni paıǵambarymyz: «Kim qaı qaýymǵa uqsasa, ol sol qaýymnan», - degen. Musylmandar arasynda qandaı da bir adam sol kúni sýǵa shomylýdy qasıet sanasa, ol kúnáli áreket bolyp sanalady, - dedi QMDB Jetisý oblysy boıynsha shárıǵat jáne pátýa bólimine jaýapty maman Qamıt Tabarak.

Eske salaıyq, osyǵan deıin Kreşenıe merekesinde SQO-da muzdyń juqalyǵyna baılanysty Esil ózeninde sýǵa shomylýǵa tyıym salynǵanyn jazǵanbyz.