Kremlde Qazaqstan men Reseı basshylarynyń beıresmı jeke kezdesýi ótedi

ASTANA. KAZINFORM – Qazaqstan men Reseı prezıdentteri beıresmı jeke kezdesý ótkizbek. Bul týraly búgin óziniń Telegram paraqshasynda QR Prezıdentiniń kómekshisi – Baspasóz hatshysy Rýslan Jeldibaı jazdy.

- Máskeýde Prezıdent Qasym-Jomart Toqaevtyń memlekettik sapary bastaldy. Memleket basshysyn saltanatty qarsy alý rásimi №1 bort Reseı áýe keńistigine ótken sátten bastalyp ketti. Erekshe qurmettiń belgisi retinde qazaqstandyq delegatsııa otyrǵan ushaqty ıstrebıtelder men tikushaqtar alyp júrip, Vnýkovo áýejaıynda áskerı orkestr men qurmet qaraýylynyń qarsy alýymen jalǵasty, - dep jazdy QR Prezıdentiniń Baspasóz hatshysy.

Sondaı-aq ol sálden soń Kremlde memleketter basshylarynyń beıresmı jeke kezdesýi ótetinin jetkizdi. Qasym-Jomart Toqaevtyń saparyna oraı Reseı Federatsııasy Prezıdentiniń atynan keshki as beriledi.

-Memleket basshysynyń erteńgi jumys kestesi de óte tyǵyz. Kremldegi resmı qarsy alý rásiminen keıin Vladımır Pýtınmen shaǵyn jáne keńeıtilgen quramda kelissózder júrgiziledi. Prezıdent sondaı-aq Qazaqstan-Reseı óńiraralyq yntymaqtastyq forýmynda sóz sóıleıdi,-dep málim etti Rýslan Jeldibaı.

Aıta keteıik, búgin Memleket basshysy Qasym-Jomart Toqaev Reseı Prezıdenti Vladımır Pýtınniń shaqyrýymen Máskeýge memlekettik saparmen bardy.

Osyǵan deıin Prezıdent Qasym-Jomart Toqaev 11-12 qarashada Reseı Federatsııasyna memlekettik saparmen baratyny habarlandy. Memleket basshysy Prezıdent Vladımır Pýtınmen kelissózder júrgizedi. Sapar aıasynda ekijaqty strategııalyq áriptestik pen odaqtastyqty damytý, saýda-ekonomıkalyq jáne mádenı-gýmanıtarlyq yntymaqtastyqty keńeıtý máseleleri talqylanady degen boljam bar.