Kreml Reseıde koronavırýstan kóz jumǵandar sanynyń az bolýyn qalypty dep esepteıdi
MÁSKEÝ. TASS – QazAqparat – Reseı Federatsııasy prezıdentiniń baspasóz hatshysy Dmıtrıı Peskov Dúnıejúzilik densaýlyq saqtaý uıymynyń «Reseıde koronavırýstan qaıtys bolǵandar sany basqa elderge qaraǵanda az ekeni «qyzyq» degen málimdemesine jaýap berdi. Bul týraly QazAqparat TASS agenttigine silteme jasap habarlaıdy.
Peskovtyń aıtýynsha reseılik derekterde erekshe eshteńe joq. Sonymen qatar, ol Reseıdegi tıipti organdar DDSU-men baılanysta ekenin atap ótip, «olar bul máseleniń sheshimin taýyp, DDSU-nyń barlyq suraǵyna jaýap beredi dep oılaımyn» dedi.
Peskov koronavırýstan kóz jumǵandardy esepteý tásiline qatysty suraqqa jaýap bermedi. «Men bul suraqqa qatysty eshteńe túsindire almaımyn. Oǵan epıdemıologtarymyz laıyqty jaýap beredi dep úmittenemin» dep suraqty sala mamandaryna joldady.
Sársenbi kúni Jenevadaǵy brıfıngte DDSU-nyń tótenshe jaǵdaı jónindegi dırektory Maıkl Raıan Reseıde koronavırýstan qaıtys bolǵandar sany basqa eldermen salystyrǵanda az ekenin «qyzyq» qubylys dep atady.
DDSU memleketterge COVID-19-dan bolǵan ólimge qatysty standartty usynys pen sertıfıkatsııa taratty. Degenmen, dırektordyń sózinshe, bul kúrdeli protsedýra, sebebi ólimge sebep bolatyn janama jaıttar bolýy múmkin.
