Kredıttik reıtıngtik agenttikterdi qyzmetin retteýdiń tártibi aıqyndaldy
ASTANA. KAZINFORM — Búgin Senattyń jalpy otyrysynda «Kredıttik reıtıngtik qyzmet týraly» Qazaqstan Respýblıkasynyń Zańy men ilespe qujat maquldandy.
Zańnyń maqsaty – Qazaqstandaǵy kredıttik reıtıngtik agenttikterdiń qyzmetin retteýdiń quqyqtyq negizin belgileý, olardyń mártebesin, qyzmet jaǵdaılaryn, táýelsizdigine, ashyqtyǵy men eseptiligine qoıylatyn talaptardy aıqyndaý.
Senattyń Qarjy jáne bıýdjet komıtetiniń málimetine qaraǵanda, qujat aıasynda kredıttik reıtıngtik agenttikterdi retteýdiń tıisti qaǵıdattaryn belgilendi:
- reıtıngtik qyzmettiń sapasy men adaldyǵy;
- reıtıngtik qyzmetti júzege asyrý kezindegi táýelsizdik;
- reıtıngtik qyzmetti júzege asyrý kezinde múddeler qaqtyǵysyn bolǵyzbaý;
- reıtıngtik qyzmettiń ashyqtyǵy;
- reıtıngtik qyzmetti júzege asyrý kezinde qupııalylyqty saqtaý.
Zańda kredıttik reıtıngtik agenttikterdiń mynadaı synyptamasy kózdeledi:
1. Halyqaralyq reıtıngtik agenttikter – reıtıngtik qyzmetti júzege asyratyn ári Ekonomıkalyq yntymaqtastyq jáne damý uıymy elderiniń qarjylyq retteýshileri, sondaı-aq ýákiletti organ tarapynan tanylǵan kredıttik reıtıngtik agenttik.
2. Sheteldik reıtıngtik agenttikter – shet memlekettiń zańnamasyna sáıkes qurylǵan, reıtıngtik qyzmetti júzege asyratyn, osy shet memlekettiń qarjylyq retteýshisi jáne ýákiletti organ moıyndaǵan, sondaı-aq halyqaralyq reıtıngtik agenttik retinde sanalmaıtyn kredıttik reıtıngtik agenttik.
3. Qazaqstandyq reıtıngtik agenttik – quryltaıshylarynyń biri QR Ulttyq Banki bolatyn, osy Zańǵa jáne quryltaı qujattaryna sáıkes reıtıngtik qyzmetti júzege asyratyn, aktsıonerlik qoǵamnyń uıymdyq-quqyqtyq nysanynda qurylǵan kredıttik reıtıngtik agenttik.
Zańda kredıttik reıtıngtik agenttikterdi korporatıvtik basqarýǵa, aqparatty ashýǵa, ishki baqylaý júıeleri men reıtıngtik qyzmetti uıymdastyrýǵa qatysty talaptar kózdeledi.
Sondaı-aq ýákiletti organǵa mynadaı quzyretter berý usynylady:
- belgilengen talaptarǵa saı keletin halyqaralyq jáne sheteldik reıtıngtik agenttikterdi taný;
- reıtıngtik qyzmet týraly zańnamany saqtaý máseleleri boıynsha qazaqstandyq reıtıngtik agenttiktiń qyzmetine tekserý júrgizý;
- reıtıngtik qyzmetke qatysty jeke jáne zańdy tulǵalardyń ótinishterin qaraý;
- qazaqstandyq reıtıngtik agenttiktiń ishki baqylaý júıesine qoıylatyn talaptardy belgileý;
- qazaqstandyq reıtıngtik agenttikke yqpal etýdiń shekteýli sharalaryn qoldaný.
- Zańdy maquldaý otandyq reıtıngtik naryqty qurýǵa jáne damytýǵa, básekege qabiletti otandyq reıtıngtik agenttikterdiń paıda bolýyna, shaǵyn jáne orta bıznesti qosa alǵanda, qazaqstandyq kompanııalar úshin joǵary sapaly reıtıngtik qyzmetterdiń qoljetimdiligin arttyrýǵa yqpal etetin bolady. Bul nátıjesinde ulttyq qarjy júıesiniń strategııalyq derbestigin arttyrýǵa yqpal etedi, - delingen Senat aqparatynda.
Aıta keteıik, bıyl sáýir aıynda Májilis kredıttik reıtıngterdiń sapasyna qatysty qujatty maquldaǵanyn jazǵan edik.
