Kredıttik qaryzy bar medıtsınalyq uıymdar sany 26%-ǵa azaıdy – Mınıstr

ASTANA. KAZINFORM –  Ótken jyldyń sońynda medıtsınalyq uıymdardyń kredıtorlyq bereshegi 44%-ǵa, al merzimi ótken bereshek 19%-ǵa tómendedi. Bul týraly Densaýlyq saqtaý mınıstri Aqmaral Álnazarova aıtyp berdi.

− Sońǵy jyldary medıtsınalyq uıymdardyń «kredıtorlyq bereshek» máseleleri oryn aldy. Júrgizilgen taldaý nátıjeleri boıynsha 3 basty sebep anyqtaldy: tómen tarıfter, dárilik zattar men medıtsınalyq buıymdardyń negizsiz satyp alynýy jáne qarjylyq tártip pen basqarýdyń jetkiliksiz deńgeıi, − dedi A.Álnazarova Májilistegi Úkimet saǵatynda.

Osyǵan baılanysty ótken jyldyń naýryzynda jedel sharalardy qamtıtyn is-sharalar jospary bekitilgen.

− 2024 jyly 5 beıin boıynsha tarıfterdi ulǵaıtýǵa basymdyq berildi, nátıjesinde medıtsınalyq uıymdarda kórsetiletin kómek sapasyn edáýir arttyrýǵa jáne qarjylyq jaǵdaıyn jaqsartýǵa múmkindik berdi. Tarıfterdiń jalpy ósimi 52%-dy, al qarjylandyrý somasy jyldyq eseppen 20 mlrd teńgeni qurady. 2025 jyldyń 1 qańtarynan bastap pallıatıvtik kómek kórsetý tarıfteri 42%-ǵa, balalarǵa arnalǵan reabılıtıtsaıalyq kómek kórsetý tarıfi 20%-ǵa ulǵaıdy. Osynyń nátıjesinde, ótken jyldyń sońynda medıtsınalyq uıymdardyń kredıtorlyq bereshegi 44%-ǵa, al merzimi ótken bereshek 19%-ǵa tómendedi, - deıdi mınıstr.

Sonymen qatar, kredıtorlyq bereshegi bar medıtsınalyq uıymdar sany 26%-ǵa qysqarǵan.

Munymen qosa, 2025 jyly 9 beıin boıynsha tarıfterdi ulǵaıtýǵa qosymsha qajettilik 84,2 mlrd teńgeni qurap otyr.

Búgin Májilis tóraǵasynyń orynbasary Danııa Espaeva Úkimet saǵatynda adamdardyń medıtsınalyq qyzmetterdiń kórsetilýine qanaǵattaný deńgeıi tómendegenin, MÁMS-ke qatysty berilgen naqty usynystar oryndalmaı otyrǵanyn aıtqan edi.

Óz baıandamasynda Densaýlyq saqtaý mınıstri Qazaqstanda ólim azaıǵanyn, ómir súrý uzaqtyǵy artyp, salany qarjylandyrý kólemi artqanyn aıtyp otyr.

Sondaı-aq, Aqmaral Álnazarova medıtsınalyq saqtandyrýǵa qatysty jańa zańnamada qandaı ózgerister bolatynyn aıtyp berdi.