Kredıttik bıýro qazaqstandyqtardyń kollektorlarǵa qaryzy týraly málimetterdi MKK-ge beredi
ASTANA. KAZINFORM – Qarjy mınıstriniń buıryǵymen Kredıttik bıýronyń memlekettik kirister organdaryna jeke tulǵalardyń kollektorlar men shaǵyn qarjy uıymdary aldyndaǵy qaryzy týraly málimetterdi usyný erejesi bekitildi.
Qujatqa sáıkes, Qarjy mınıstrliginiń Memlekettik kirister komıteti esepti jyldan keıingi jyldyń 25 qarashasyna deıin esepti jyldyń 31 jeltoqsanyna deıingi jaǵdaı boıynsha aktıvter men mindettemeler, tabys jáne múlik deklaratsııasyn usyný mindeti týyndaǵan jeke tulǵalardyń tizimin qurady.
Tizim qalyptastyrylǵan kúnnen bastap 10 kúntizbelik kún ishinde komıtet atalǵan jeke tulǵalardyń (JSN) derekterin «Smart Data Finance» aqparattyq júıesi arqyly avtomattandyrylǵan túrde Kredıttik bıýroǵa jiberedi.
Kredıttik bıýro komıtetten jeke tulǵalar (JSN) týraly málimetterdi alǵan kúnnen bastap 10 jumys kúni ishinde, avtomattandyrylǵan túrde «Smart Data Finance» aqparattyq júıesi arqyly komıtetke kelesi kredıttik esepten málimetterdi jiberýi qajet:
- aktıvter men mindettemeler, tabys jáne múlik deklaratsııasyn usyný mindeti týyndaǵan jeke tulǵalardyń kollektorlyq uıymdarǵa qaryzy týraly málimetter;
- aktıvter men mindettemeler, tabys jáne múlik deklaratsııasyn usyný mindeti týyndaǵan jeke tulǵalardyń mıkroqarjy uıymdaryna qaryzy týraly málimetter.
Bul rette komıtet pen kredıttik bıýro Qazaqstan zańnamasyna sáıkes salyqtyq jáne basqa da zańmen qorǵalatyn qupııany qorǵaýǵa, jeke tulǵalardyń derekteriniń jarııa bolyp ketýine nemese jylystaýyna jol bermeýge mindetti.
Aıta keteıik, 2026 jyldan bastap salyq tóleýshilerge kepilsiz tólem merzimin shegerý jeńildigi beriledi.