Kredıtter keshirilgeni týraly tarap jatqan aqparat – feık

ASTANA. QazAqparat – Qarjy naryǵyn retteý jáne damytý agenttigi «kredıtterge amnıstııa» jasalǵany týraly áleýmettik jelilerdegi habarlamalarǵa túsinik berdi, dep habarlaıdy QazAqparat.

Málim etilgendeı, áleýmettik jelilerde jáne messendjerlerde «kredıttik raqymshylyq» jasaldy jáne qaryzdardyń barlyq túrleri esepten shyǵaryldy» degen syndy aqparattar aýyq-aýyq shyǵyp turady.

Qarjy naryǵyn retteý jáne damytý agenttigi bul aqparattar shyndyqqa janaspaıtynyn málimdeıdi.

Bul rette agenttik byltyr nesıesi boıynsha qaryzy bar azamattardy qoldaýǵa baǵyttalǵan biryńǵaı tártip engizilgenin eske salady.

«Atap óteıik, kredıtter boıynsha merzimi ótken bereshegi bar azamattardy qoldaý úshin 2021 jylǵy qazannan bastap bereshekti retteýdiń biryńǵaı mindetti tártibi engizildi.

Kredıtterdiń merzimi ótip ketken jaǵdaıda qaryz alýshylar bankke nemese mıkroqarjy uıymyna ótinishpen júginýi qajet. Onda olardyń ótinishi qaralady jáne problemaly bereshekti qaıta qurylymdaý sharttary usynylady.

Qaryzdy qaıta qurylymdaý sharttary:

- syıaqy mólsherlemesin tómendetý;

- tólemdi keıinge qaldyrý;

- óteý ádisin ózgertý;

- qaryz merzimin ulǵaıtý;

- merzimi ótken negizgi boryshty jáne (nemese) syıaqyny keshirý, turaqsyzdyq aıybyn (aıyppul, ósimpul), qaryzǵa qyzmet kórsetýge baılanysty komıssııalar men ózge de tólemderdi joıý jáne taǵy basqa túrinde bolýy múmkin.

Eger qaryz alýshy qaryzdy qaıta qurylymdaý sharttary boıynsha kredıtormen kelisimge kele almasa, ol kredıtordyń jaýabyn alǵan kúnnen bastap 15 kún ishinde agenttikke júginýge quqyly»,- dedi vedomstvodan.

Aıta keteıik, bereshekti retteý týraly sheshim qaryz alýshynyń qarjylyq jaı-kúıin jáne onyń qarjy uıymy aldyndaǵy mindettemelerin oryndaý jónindegi múmkindikterin tereń taldaý negizinde jeke tártippen qabyldanady.