Kredıtorlar komıteti Alıans banktiń syrtqy qaryzdaryn qaıta qurylymdaý josparyn maquldady
ALMATY. Jeltoqsannyń 15-i. QazAqparat /Erbol Azanbek/ - Alıans bankiniń kredıtorlar komıteti banktiń syrtqy qaryzdaryn qaıta qurylymdaý josparyn maquldady. Bul týraly búgin Almatyda arnaıy ótken baspasóz máslıhatynda banktiń basqarma tóraǵasy Maqsat Qabashev aıtty,
dep habarlaıdy QazAqparat.
Maqsat Qabashevtiń aıtýynsha, búgin ótken jınalys barysynda qaıta qurylymdaý josparyn bank kredıtorlarynyń 95,1 paıyzy qoldap daýys bergen. Daýys berýge kredıtorlardyń barlyǵy qatysqan. Buǵan deıin belgili bolǵandaı, qaıta qurylymdaýǵa jatqyzylatyn qaryzdyń jalpy somasy 677 mıllıard teńge nemese 4,5 mıllıard dollardy quraǵan edi. Qaıta qurylymdaýdyń júzege asyrý nátıjesinde bank qaryzy 150 mıllıard teńge nemese 1 mıllıard AQSh dollaryna deıin qysqarmaq. Banktiń basqarma tóraǵasynyń aıtýynsha, búgingi daýys berý kelissózder úderisiniń sońǵy kezeńi bolyp tabyldy. Budan keıin qaıta qurylymdaý josparyn Almaty qalasy mamandandyrylǵan Qarjylyq soty bekitýi tıis. Bul jumystardy bank 2010 jyldyń 1-shi naýryzyna deıin júzege asyrmaq. Bunymen bankti qaıta qurylymdaý jumystary aıaqtalyp, bank ary qaraı turaqty jumys isteıtin bolady.
Bank basshylyǵynyń aıtýynsha, qaıta qurylymdaý qysqa ári tabysty túrde júzege asyrylǵan. «Banktiń endi taza balansy, ońtaıly uıymdyq qurylymy, korporatıvti basqarýdyń ashyq júıesi jáne jańa damý strategııasy bolady», deıdi M.Qabashev. Onyń aıtýynsha, endigi ýaqytta banktiń 67 paıyzdyq aktsııasyna «Samuryq-Qazyna» UÁQ men qalǵan 33 paıyzyna kredıtorlar komıteti ıelik etetin bolady. Sonymen qatar, jańa jyldan bastap shaǵyn jáne orta bıznesti, jeke tulǵalardy nesıelendirý qaıta jandandyrylmaq.
