Kredıtin óteı almaıtyn jaǵdaıǵa tap bolǵan adam ne isteýi kerek

ASTANA. Kazinform – Bank ombýdsmany Darhan Nurpeıisov bankten nesıe alǵan adam qaryzyn óteı almaıtyn jaǵdaıǵa tap bolsa, birinshi kezekte ne isteýi keregin aıtty. 

— Ómirde ártúrli jaǵdaı bolady. Qaryz alýshy sondaı qıyn jaǵdaıǵa tap bolsa, ol bank ombýdsmanyna júginýge quqyly. Biraq oǵan deıin ol banktiń ózi nemese kollektorlyq uıymǵa barýy kerek. Máselesin aıtyp, óz usynystaryn berýi kerek. Bank 15 kúnniń ishinde qaryz alýshynyń usynystaryn qarap, ne kelisýi kerek, ne kelispeýshiligin bildirip, óziniń usynystaryn berýi kerek. Sodan keıin ǵana azamat ombýdsman qyzmetine júgine alady. Ondaı kezde biz qaryz alýshynyń qarjylyq jaǵdaıyn qarap, qujattaryn kórip, mán-jaıǵa kóz jetkizgennen keıin birge otyryp, bankke usynystarymyzdy jiberemiz. Bul usynysty bank qarap, jaýabyn berýi kerek, - dedi ol OKQ alańynda ótken baspasóz máslıhatynda.

Sondaı-aq maman ombýdsmannyń aralasýynan keıin de bank tarapy nesıe sharttaryn qaıta qaraýdan bas tartsa, azamattar ne isteýi keregin aıtty. 

— Bank bizdiń de usynystarymyzben kelispese nemese zańdy túrde ony qabyldaıtyn quqyǵy bolmasa, onda qaryz alýshynyń memlekettik organǵa nemese sotqa júginýge quqyǵy bar, - dep túıdi sózin Darhan Nurpeıisov. 

Aıta keteıik, buǵan deıin bank ombýdsmany azamattardyń barlyq kredıti boıynsha daýlardy retteýge mindetti bolatyny jaıly jazǵan edik.