Kredıt raqymshylyǵyn uzartý týraly aqparat shyndyqqa janaspaıdy - mınıstrlik
Qazaqstanda azamattar úshin «kredıttik raqymshylyqty» uzartý josparlanyp otyrǵany týraly birqatar BAQ-taǵy jarııalanymdar jýrnalısterdiń «Ashyq derekter» portalynda ornalastyrylǵan QR Úkimeti qaýlysynyń jobasyn durys túsindirmeýine negizdelgen jáne shyndyqqa sáıkes kelmeıdi.
Memleket basshysynyń 2019 jylǵy 26 maýsymdaǵy «Qazaqstan Respýblıkasy azamattarynyń borysh júktemesin azaıtý sharalary týraly» Jarlyǵyn oryndaý úshin «Qazaqstan Respýblıkasy azamattarynyń borysh júktemesin azaıtýǵa arnalǵan qarajatty paıdalanýdyń keıbir máseleleri týraly» Qazaqstan Respýblıkasy Úkimetiniń 2019 jylǵy 15 shildedegi qaýlysy qabyldanǵany belgili.
Qaýlymen esepten shyǵarý merzimi 2019 jylǵy 13 jeltoqsannan keshiktirilmeı belgilengen.
QR azamattarynyń borysh júktemesin azaıtý úsh kezeńde júrgizildi.
Birinshi kezeńde esepten shyǵarý 2019 jyldyń qyrkúıeginde 507,4 myń azamatqa jalpy somasy 105,2 mlrd teńgege, ekinshi kezeńde 2019 jylǵy jeltoqsanda 46,9 myń azamatqa jalpy somasy 9,8 mlrd teńgege júzege asyryldy.
Jarlyqqa qatysy bar adamdardy tolyq qamtý maqsatynda Mınıstrlik 2020 jyldyń sáýir aıynda jalpy somasy 5,5 mlrd.teńgege 23,4 myń azamatty úshinshi kezeńde esepten shyǵarýdy júzege asyrdy.
Osyǵan baılanysty QR Eńbek jáne halyqty áleýmettik qorǵaý mınıstrligi 2020 jyldyń І toqsanynda naqty júrgizilgen jumystardy eskere otyryp, esepten shyǵarý merzimin túzetýdi kózdeıtin «Qazaqstan Respýblıkasy Úkimetiniń 2019 jylǵy 15 shildedegi «Qazaqstan Respýblıkasy azamattarynyń borysh júktemesin azaıtýǵa arnalǵan qarajatty paıdalanýdyń keıbir máseleleri týraly» qaýlysyna ózgerister engizý týraly» QR Úkimeti qaýlysynyń jobasyn ázirledi.
Búgingi kúni bereshekti esepten shyǵarý boıynsha barlyq jumys aıaqtaldy jáne olardy qaıta bastaý boljanyp otyrǵan joq.