Kredıt alyp beremiz: kásipkerlerge saq bolý eskertildi

ASTANA. KAZINFORM – Shaǵyn kásip ashqan jandar jeńildetilgen nesıe, sýbsıdııa tetikterin qarastyratyny belgili. Osy oraıda bıznes jospar quryp, jeńil nesıe alýǵa qoldaý kórsetetin qyzmet túri paıda bolǵan. Osy tusta kásipti endi qolǵa alǵan jandarǵa eskertý jasaldy. Bul týraly «Damý» kásipkerlikti damytý qorynyń basqarma tóraǵasy Farhat Sársekeev málim etti.

- Iá, bul másele bar. Naryqta buryn bankte, kredıttik uıymdarda nemese buryn «Damý» qorynda jumys istegen azamattar ózderiniń kompanııasyn ashyp, kómektesemiz, bıznes jospar jasap beremiz, nesıe alyp beremiz dep qyzmet kórsetip júr. Ony biz tekserip, sheteldik tájirıbege súıenip, osyndaı konsaltıngtik kompanııalardy rettep, olardy akkredıtatsııa jasaý sheshimine kelip otyrmyz. Óıtkeni olarmen kúres tıimsiz bolyp otyr. Jaraıdy, buryn bankte jumys istegen qyzmetkerler jumysyn isteı bersin ári qaraı, biraq, biz ony retteıtin boldyq. Biz qaýipsizdik departamenti arqyly aldymen alaıaq bolmaýyn tekserip, ekinshiden tájirıbesine qarap, sharttar engizip, tizimin shyǵaramyz. Pılottyq rejımde bastadyq, shildede bastaldy, osy qarasha aıynda bitedi, - dedi Farhat Sársekeev Jibek joly telearnasynyń «Ýáde» baǵdarlamasyna bergen suhbatynda.

Onyń aıtýynsha, kásipkerler alaıaqtyń arbaýyna túsip qalmaýy úshin árbir aqparatty muqııat tekserýi qajet.

- Bizdiń mıssııa – makro, shaǵyn jáne orta kásipkerlikti damytý, qarjylyq qoldaý. Kásipkerler tekserilgen, zańnamamen bekitilgen aqparatqa súıený kerek. Ol úshin bizdiń veb paraqshamyzǵa kirip, fılıalymyzǵa kelip nemese «1408» Call ortalyǵyna habarlasyp bilýge bolady. Árıne, ártúrli kásipkerler bolady, - deıdi ol.

Aıta keteıik, elimizde shaǵyn jáne orta bıznespen aınalysatyn kásipkerlerge ekinshi deńgeıli bankter arqyly jeńildetilgen nesıe berilip jatyr.