Kreatıvti ındýstrııanyń el ekonomıkasyna qosatyn úlesin 5% deıin arttyramyz - vıtse-premer
«Qazaqstanda kreatıvti ındýstrııany damytýdyń 2021-2025 jyldarǵa arnalǵan tujyrymdamasy qabyldandy. Onyń mindetteriniń biri - iri otandyq, joǵary tehnologııalyq iri kompanııalardyń paıda bolýy jáne tehnologııalyq jáne venchýrlik kásipkerlikti damytý esebinen jańa jumys oryndaryn qurý arqyly jastardyń kreatıvti ári bilimdi bóligin jumyspen qamtý bolyp sanalady. Kreatıvti sektor ósýdiń jańa jáne perspektıvaly kózi retinde Qazaqstanda kreatıvti ındýstrııalardyń údemeli jáne josparly damýyna negiz qalaýǵa múmkindik beredi. Dál osy kreatıvti ındýstrııa búginde álemde jańa tehnologııalardyń, jańa salalardyń, jańa materıaldyq taýarlardyń jáne el úshin mańyzdy ekonomıkalyq artyqshylyqtardyń negizgi kózi retinde áreket etedi», - dedi vıtse-premer elordada ótip jatqan І Ortalyq Azııa medıaforýmynda.
Onyń atap ótýinshe, shyǵarmashylyq ındýstrııa - tapqyrlyq pen shyǵarmashylyq nátıjesin bızneske jáne shetelge eksporttaýǵa, sondaı-aq tabys tabýǵa aınaldyrý.
«Jalpy, elimizde normatıvtik-quqyqtyq baza qabyldanyp, kreatıvti ındýstrııany júıeli damytýdyń negizi qalandy. Kreatıvti sektor shıkizattyq emes eksportty damytý máselelerinde jumyspen qamtýdy qamtamasyz etý, halyq úshin, ásirese jastar arasynda tabysty arttyrý máselesinde aıtarlyqtaı áleýetke ıe. Aldymyzda kreatıvti ındýstrııanyń el ekonomıkasyna qosqan úlesin 2025 jyly 5 paıyzǵa deıin arttyrý mindeti tur», - dedi Altaı Kólginov.
