Kreatıvti ındýstrııany damytý úshin kadr daıyndaý mańyzdy - Qyrymbek Kósherbaev
Sharaǵa Qazaqstan Respýblıkasy Premer-Mınıstriniń orynbasary Eraly Toǵjanov, QR Bilim jáne ǵylym vıtse-mınıstri Qýanysh Erǵalıev, Qazaqstan Respýblıkasynyń Ulttyq ekonomıka vıtse-mınıstri Álisher Ábdiqadyrov, ǵalymdar, ýnıversıtettiń oqytýshy-professorlary men stýdentter qatysty.
Kezdesý barysynda Qyrymbek Kósherbaev Memleket basshysy Qasym-Jomart Toqaevtyń kreatıvti ındýstrııany damytý maqsatynda bergen tapsyrmasyna sáıkes atqarylǵan jumystarǵa toqtaldy.
«Memleket basshysynyń tapsyrmasyna sáıkes bul baǵytta alǵashqy jumystar bastaldy. Úkimet kreatıvti ındýstrııany damytý boıynsha jobalyq keńse qurdy. Qarasha aıynda «2021-2025 jyldarǵa arnalǵan kreatıvti ındýstrııany damytý tujyrymdamasy» qabyldandy. Soǵan sáıkes, Nur-Sultan, Almaty jáne Shymkent qalalarynda bıznes-ınkýbatorlar, ortalyqtar men habtar qurý qarastyrylǵan. Almaty qalasynda qurylatyn bıznes-ınkýbatorǵa Ál-Farabı atyndaǵy Qazaq ulttyq ýnıversıteti negiz bolýy kerek dep esepteımin. Oǵan tolyq múmkindikter bar. Jalpy kez kelgen qoǵamda kreatıvti ıdeıalardy týdyratyn orta ol-joǵary oqý oryndary men ondaǵy entýzıast jas ǵalymdar. Bul turǵyda Ál-Farabı atyndaǵy Qazaq ulttyq ýnıversıteti qazaqtyń ıntelektýaldy tarıhynda burynnan kóshbasshy»,– dedi Memlekettik hatshy.
Sonymen qatar, óz sózinde Qyrymbek Kósherbaev kreatıvti ındýstrııany damytý úshin básekege qabiletti mamandardy daıyndaý qajettigin jetkizdi.
«Kreatıvti ındýstrııany damytý úshin kadr daıyndaý mańyzdy. Máselen, Batys elderinde aqyn-jazýshylardyń kitaptaryn jarnamalap, satý isimen ádebı agentter aınalysady. Sol sekildi bizdiń de qalamgerlerdiń týyndylaryn shet tilderine aýdaryp, naryqqa shyǵarýmen aınalysatyn bilikti mamandardy daıarlaý qajet. Budan bólek, tsıfrly jańa tehnologııanyń qarqyndy damýy da jańa mamandyqtardyń, kýrstardyń ashylýyn mindettep otyr»,- dedi Qyrymbek Kósherbaev.
Shara barysynda QazUÝ rektory Janseıit Túımebaev búgingi kezdesý ýnıversıtettiń talantty jastary úshin mańyzy zor ekenin atap ótti.
«Memlekettiń keleshegin qalyptastyratyn-básekege qabiletti, bilimdi jastar. Búgingi tańda bizdiń jas ǵalymdarymyz, talantty ónerpazdarymyz elimizdi halyqaralyq deńgeıde tanytýda. Shyǵarmashylyq ındýstrııa-jahandyq ekonomıkanyń eń jyldam damyp kele jatqan baǵyttarynyń biri. Sońǵy onjyldyqta shyǵarmashylyq salalar qoǵamnyń áleýmettik jáne mádenı damýyna erekshe áser etti. Osy oraıda, Qazaqstandaǵy kreatıvti ındýstrııany damytý máselelerine arnalǵan búgingi kezdesýdiń, ásirese bizdiń talantty jastarymyz úshin mańyzy óte zor»,– dedi ýnıversıtet basshysy.
Kezdesý ashyq dıalog formatynda ótti. Stýdentter Memlekettik hatshy Qyrymbek Kósherbaevqa ózderin qyzyqtyrǵan suraqtaryn qoıyp, kreatıvti ındýstrııany damytý boıynsha jańa ıdeıalaryn ortaǵa saldy.
Zań fakýltetiniń 1 kýrs doktoranty Aqerke Jaqysh kreatıvti ındýstrııany damytýǵa úles qosatyn jastar úshin jańa bilim berý baǵdarlamasyn iske qosý qajet ekenin atap ótti.
«Osy maqsatta kreatıvti salalar úshin damý qoryn qurý jáne ınvestıtsııalyq jáne qarjylyq saıasatta, salyq salýda, ımport pen eksportta belgili bir yntalandyrýlardy qoldaný qajet dep sanaımyz. Sondaı-aq, kreatıvti ındýstrııanyń damýyna óz úlesin qosatyn jas talanttardy oqytý úshin jańa bilim berý baǵdarlamalaryn ázirleýdi usynamyz»,- dedi Aqerke Jaqysh.
Kezdesý aıasynda memlekettik hatshy Qyrymbek Eleýuly bastaǵan delegatsııa Ál-Farabı kitaphanasyndaǵy ýnıversıtet ǵalymdarynyń eńbekteri qoıylǵan ǵylymı jetistikter kórmesimen tanysty.
