Kreatıvti naryqtaǵy álemdik reıtıng: Qazaqstan 28 pozıtsııaǵa kóterildi

ASTANA. KAZINFORM — Kreatıvti ındýstrııalar boıynsha serpilis jasaǵan Qazaqstan álemdik reıtıngte 28 pozıtsııaǵa kóterildi.

QR Mádenıet jáne aqparat mınıstrliginiń baspasóz qyzmeti málimdegendeı, Jenevada (Shveıtsarııa) Global Innovation Index-2024 (GII) bedeldi álemdik reıtınginiń nátıjeleri jarııalandy.

Sarapshylar bilim, ǵylym, bıznes, tehnologııa jáne ınnovatsııa salasyndaǵy jetistikter — barlyǵy 80 kórsetkish boıynsha 130-dan astam eldiń reıtıngin jasady.

«Qazaqstannyń kreatıvti naryǵynda qarqyndy damý serpini baıqaldy. El „Kreatıvti taýarlar men qyzmetter“ kórsetkishi boıynsha 93-ten 65-orynǵa kóterildi.

Reıtıngtegi bul nátıje — júrgizilip jatqan memlekettik reformalardyń jemisi.

Qazaqstan «Ulttyq kórkem fılmder» kórsetkishinde de serpilis jasap, 61-orynnan 31-orynǵa kóterildi.

Ortalyq jáne Ońtústik Azııanyń aımaqtyq reıtınginde Qazaqstan alǵashqy úshtikke enip, Úndistan men Irannan keıingi ornyn saqtap qaldy», — dep jazdy vedomstvodan.

Global Innovation Index-ti BUU janyndaǵy Dúnıejúzilik zııatkerlik menshik uıymy (WIPO) jasaıdy. GII reıtıngi halyqaralyq bedel men ınvestıtsııa tartýǵa aıtarlyqtaı áser etedi.