Kreatıvti ındýstrııany damytýǵa arnalǵan jańa zań jobasy maquldandy

ASTANA. KAZINFORM — Májilis kreatıvti ındýstrııany damytýǵa arnalǵan jańa zań jobasy maquldady. 

Qujatty Májilis depýtaty Erlan Stambekov tanystyrdy. Óziniń aıtýynsha, zań jobasy shyǵarmashylyq salany zań júzinde qoldaýǵa jáne onyń quqyqtyq negizin kúsheıtýge arnalǵan.

— Zań jobasy «Kásipkerlik kodeks» pen «Mádenıet týraly», «Memlekettik jastar saıasaty týraly» zańdarǵa túzetýler engizýdi kózdeıdi. Bul ózgerister shyǵarmashylyq salany keshendi túrde damytýǵa, quqyqtyq negizin aıqyndaýǵa jáne memlekettik qoldaýdy jetildirýge múmkindik beredi. Qujatta kreatıvti ındýstrııany qoldaıtyn memlekettik organnyń quzyretteri naqty kórsetilgen, — dedi ol.

Sondaı-aq, ol usynylyp otyrǵan normalar jergilikti organdardyń mindetterin de aıqyndaıtynyn aıtady.

— Oblys, qala jáne aýdan ákimderi óńirlik kreatıvti klasterlerdi damytýǵa, ınfraqurylym jasaýǵa jáne qoldaý baǵdarlamalaryn iske asyrýǵa jaýapty bolady. Osy normalar arqyly kreatıvti ındýstrııany quqyqtyq turǵydan qorǵaýǵa alyp, jobalardy baǵalaý jáne ınvestıtsııa tartý arqyly salany turaqty damytý kózdelip otyr. Bul zań jobasy qabyldansa, Qazaqstanda shyǵarmashylyq salaǵa quqyqtyq negizde qoldaý kórsetýdiń jańa dáýiri bastalady, — dedi Erlan Stambekov.

Resmı málimet boıynsha, kreatıvti ındýstrııa salasynda jumys isteıtin 46 myńnan astam uıym tirkelgen. Ol uıymdarda 143 myńǵa jýyq adam jumys isteıdi. Kreatıvti ekonomıkanyń eldiń jalpy ishki ónimindegi úlesi 1 paıyzǵa jaqyndaǵan. Bul dy 2017 jyldyń kórsetkishinen úsh ese kóp.

Eske salsaq, Mádenıet jáne aqparat mınıstriniń buıryǵymen kreatıvti ındýstrııaǵa jatatyn ekonomıkalyq qyzmet túrleriniń tizbesi bekitilgen bolatyn.