Kreatıvti ındýstrııany damytý «Qazaqstan halqyna» qory esebinen júrgizile me
ASTANA. KAZINFORM – «Qazaqstan halqyna» qoryna aýdarylatyn qarjynyń 3%-yn kreatıvti ındýstrııaǵa baǵyttaý josparlanyp otyr. Májilis depýtaty Rınat Zaıytov bul máselege alańdatýshylyq tanytty.
«Búgingi zań jobasy aıasynda kreatıvti ındýstrııany damytý salasyndaǵy memlekettik saıasatty qalyptastyrý men iske asyrýǵa qatysty túzetýler engizilip otyr. Mınıstr onyń ishinde lotereıa operatorlarynan jáne «Qazaqstan halqyna» qoryna aýdaratyn tabysynyń 3% sol kreatıvti ındýstrııaǵa baǵyttaýdy usynyp otyr. «Qazaqstan halqyna» qorynyń qarajaty ol muqtaj jandarǵa baǵyttalǵan qarjy. Osy oraıda suraq, bul qanshalyq qajet?», - degen saýal qoıdy Rınat Zaıytov Májilistiń jalpy otyrysynda.
Halyq qalaýlysynyń saýalyna Mádenıet jáne aqparat mınıstri Aıda Balaeva jaýap berdi.
«Kreatıvti ındýstrııa búginde eń turaqty ári qarqyndy damyp kele jatqan salalardyń biri. Oǵan sebep 2022 jyly Prezıdent Úkimettiń aldyna osyndaı mindet qoıǵan. Onyń ishinde Úkimettiń janynan kreatıvti ındýstrııany damytý boıynsha jobalyq keńse ashyldy», - deıdi vedomstvo basshysy.
Sondaı-aq mınıstr kreatıvti ındýstrııany damytý tujyrymdamasynyń bekitilgenin aıtty.
«Ózińiz aıtqan, qorǵa qatysty qazir talqylaý júrip jatyr, tolyq, ortaq jaýapqa kelgen joqpyz. Sondyqtan osy máseleni ekinshi oqylymǵa deıin sizdermen talqylaýǵa daıynbyz. Jalpy qor kerek, sebebi kreatıvti ındýstrııany damytý salasyndaǵy jobalardy qoldaımyz desek, álbette qarjylandyrý jaǵyn sheshý kerek, sony qordy qurý qajet, al qarjyny qaıdan keletinin ózderińizben aqyldasaıyq», - dep tolyqtyrdy A. Balaeva.
Onyń aıtýynsha, kreatıvti ındýstrııa salasyndaǵy kásipkerler, jeke tulǵalar túrli ıdeıa, jobalardy usynyp jatyr, biraq ony qarjylandyrý jaǵy sheshilmegen.
«Sondyqtan kreatıvti ındýstrııany damytý qoryn quryp, jobalar baıqaýyn uıymdastyryp, tıimdi, nátıjeli bolǵan jaǵdaıda qarjylandyrý jaǵyn qaraıdy. Biz ony memleketten bıýdjetten qarjylandyra almaımyz, sondyqtan qarjy kózderin izdeımiz. Bul jerde biz eki qordy qarastyryp otyrmyz, ol «Sátti juldyz» lotereıa AQ jáne «Qazaqstan halqyna» qory. Biraq, naqty kelisimge kelgen joqpyz, áli de talqylanady, zań jobasynyń ekinshi oqylymyna deıin depýtattarmen naqtylap, bir sheshimge kelemiz», - dep túsindirdi Mádenıet jáne aqparat mınıstri.
Aıta keteıik, búgin kreatıvti ındýstrııany damytý týraly zań jobasy Májilistiń birinshi oqylymynda maquldandy.
