Kreatıvti ındýstrııaǵa jatatyn qyzmet túrleriniń sany 53-ke jetti
ASTANA. KAZINFORM — Qazaqstanda kreatıvti ındýstrııaǵa jatatyn qyzmet túrleriniń tizimi keńeıtildi.
Memleket basshysynyń tapsyrmasyna sáıkes, Mádenıet jáne aqparat mınıstrligi kreatıvti ındýstrııany damytý jáne salany memlekettik qoldaý tetikterin jetildirý jumystaryn jalǵastyryp keledi.
— Osyǵan baılanysty Qazaqstan Respýblıkasy Mádenıet jáne aqparat mınıstriniń «Kreatıvti ındýstrııaǵa jatatyn ekonomıkalyq qyzmet túrleriniń tizbesin bekitý týraly» buıryǵyna ózgerister engizildi. Nátıjesinde kreatıvti ındýstrııaǵa kiretin ekonomıkalyq qyzmet túrleriniń (EQJJ) sany 43-ten 53-ke deıin ulǵaıdy, — delingen mınıstrlik habarlamasynda.
Tizimge mynadaı qyzmet túrleri engizildi:
•«Veb-portaldar qyzmeti»;
•«Radıohabar taratý»;
• «Mádenıet salasyndaǵy bilim berý»;
• «Jarnama agenttikteriniń qyzmeti»;
• «Kitap basyp shyǵarý»;
• «Ózge de baspa qyzmeti»;
• «Kınofılmder, beınefılmder men televızııalyq baǵdarlamalardy taratý qyzmeti»;
• «Kınofılmderdi kórsetý qyzmeti»;
• «Ózge de polıgrafııalyq óndiris»;
• «Tyǵynnan, sabannan jáne órýge arnalǵan materıaldardan buıymdar óndirý».
Vedomstvonyń málimetinshe, tizimniń keńeıýi kreatıvti ındýstrııa sýbektileriniń aıasyn naqty aıqyndaýǵa, olardyń memlekettik qoldaý sharalaryn paıdalanýyna jol ashýǵa, salanyń ashyqtyǵyn arttyrýǵa ári shyǵarmashylyq kásipkerliktiń damýyna qosymsha serpin berýge múmkindik beredi.
Budan buryn kreatıvti ındýstrııaǵa arnalǵan QazaqCreative platformasy iske qosylǵanyn jazǵan edik.
