Kreatıvti ındýstrııaǵa jańa serpin: memlekettik qoldaýdyń jańa tetikteri engizildi
ASTANA. KAZINFORM — Qazaqstanda kreatıvti ındýstrııa sýbektterin memlekettik qoldaý jáne yntalandyrý qaǵıdalary bekitildi. Jańa qujat salany damytýdyń júıeli ári ashyq tásilin qalyptastyryp, kreatıvti jobalardyń ıdeıa men pılottyq sheshimderden bastap, halyqaralyq naryqtarǵa shyǵý jáne kommertsııalandyrýǵa deıingi kezeńin qamtıdy. Bul týraly Mádenıet jáne aqparat mınıstrligi málim etti.
Qarjyny qaıtarý máselesine de erekshe mán berilgen. Memlekettik qoldaý jobalardyń turaqtylyǵy men ekonomıkalyq jaǵdaıyna baǵyttalyp, grant arqyly qarjylandyrý úlesin barynsha azaıtýdy jáne jeke ınvestıtsııa tartýdy kózdeıdi.
— Qujatta kreatıvti jáne pılottyq jobalardy qarjylandyrý, birlesip qarjylandyrýǵa arnalǵan qarjylyq quraldar, jeke ınvestorlarmen birlesken bastamalardy iske asyrý, kreatıvti ónim eksportyn qoldaý, zııatkerlik menshikti tirkeý jáne quqyqtyq qorǵaýǵa jumsalǵan shyǵyndardy óteý, halyqaralyq shyǵarmashylyq baıqaýlar men is-sharalarǵa qatysý, sondaı-aq halyqaralyq deńgeıdegi jetistikter úshin syıaqy berý máseleleri qarastyrylǵan, — delingen habarlamada.
Sonymen qatar, qarjylyq emes qoldaý sharalary da anyqtalǵan. Olarǵa konsýltatsııalyq, akseleratsııalyq jáne bilim berý boıynsha qoldaý, halyqaralyq mádenı jáne kreatıvti platformalarǵa qatysýǵa járdemdesý, úı-jaılar men jabdyqtardy jeńildetilgen sharttarmen usyný, tsıfrlyq servıster men onlaın-platformalardy damytý, jobalarǵa marketıngtik jáne quqyqtyq jetekshilik etý, kreatıvti ındýstrııany damytýdyń óńirlik strategııalaryn ázirleý, ınklıýzııany qamtamasyz etý sharalary jáne salanyń jekelegen baǵyttary boıynsha arnaıy baǵdarlamalar kiredi.
Qaǵıdalardyń qabyldanýy kreatıvti ındýstrııany el ekonomıkasynyń mańyzdy jáne básekege qabiletti salasyna aınaldyrýǵa baǵyttalǵan. Kreatıvti ındýstrııa el úshin tabys ákelip, jumys oryndaryn quryp, eksportty damytýǵa múmkindik beredi.
Eske sala keteıik, buǵan deıin Prezıdent TMD aıasynda Kreatıvti ındýstrııa qaýymdastyǵyn qurý bastamasyn kóterdi.