Kreatıvti ındýstrııa salasynda 100 myńnan astam qazaqstandyq eńbek etip jatyr

ASTANA. KAZINFORM – Búginde elimizde jalpy ishki ónimindegi kreatıvti ındýstrııanyń úlesi – 1,02 paıyz. Bul týraly Mádenıet jáne aqparat mınıstri Aıda Balaeva málim etti.

— Qazaqstan kreatıvti ındýstrııany damytý salasynda da aıtarlyqtaı serpilis jasady. Naqtyraq aıtqanda, kreatıvti ındýstrııany qoldaý jáne damytý týraly zań jobasy ázirlendi. Osy saladaǵy kásipkerler úshin salyq jeńildikteri engizildi, búginde óńirlerde kreatıvti habtar qurylyp jatyr. Salany júıeli qoldaý maqsatynda Memleket basshysy «Kreatıvti ındýstrııany damytý qoryn» qurýdy tapsyrdy, — dedi Aıda Balaeva elordada ótip jatqan Ortalyq Azııa medıaforýmda.

Mınıstrdiń málimdeýinshe, kreatıvti qordyń maqsaty — talanttardy anyqtaý, jobalardy damytý jáne qazaqstandyq kontentti halyqaralyq deńgeıde ilgeriletý.

— Úkimet kreatıvti ındýstrııalardy damytýdyń 2021-2025 jyldarǵa arnalǵan tujyrymdamasyn bekitip, iske asyryp jatyr. Onda kreatıvti tehnologııalarǵa jatatyn 43 qyzmet túri aıqyndalǵan. Kreatıvti ındýstrııalarda búginde 100 myńnan astam adam jumyspen qamtylǵan, jumys istep turǵan kásipkerlik sýbektileriniń sany — 39 myńnan astam. Qazaqstannyń jalpy ishki ónimindegi kreatıvti ındýstrııanyń úlesi — 1,02 paıyz, — deıdi vedomstvo basshysy.

Eske sala keteıik, qreatıvti ındýstrııany damytýǵa qatysty jańa normalar engizý máselesi byltyr Májiliste qaraldy. 

Sondaı-aq Úkimet basshysy Oljas Bektenov bıyl 1 shildege deıin kreatıvti ındýstrııany damytý qory qurylatynyn aıtty. 

Aıta keteıik, Astanada ІІ Ortalyq Azııa medıaforýmy ótip jatyr. Forýmǵa Qazaqstan, Ózbekstan, Qyrǵyzstan, Ázerbaıjan, Tájikstan, Túrikmenstan, Ulybrıtanııa, Qytaı, Qatar, Reseı jáne basqa da elderden 700-den astam delegat qatysyp jatyr.

Buǵan deıin Mádenıet jáne aqparat mınıstri Ortalyq Azııa jýrnalıster akademııasy men kreatıvti hab qurýdy usyndy. Sonymen qatar Ortalyq Azııa elderiniń BAQ ókilderine arnalǵan ortaq syılyq taǵaıyndaý bastamasyn alǵa tartty.