«Kraýdsorsıng» jobasynyń negizgi maqsaty túsindirildi
ASTANA. QazAqparat - Jergilikti atqarýshy organdar men qoǵam arasyndaǵy kommýnıkatsııalyq kedergilerdi joıýǵa negizdelgen «Kraýdsorsıng» jobasy iske asyrylyp jatyr. Bul týraly búgin «Qazaqstan - 2050» qozǵalysy» keńesiniń tóraǵasy, QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııa múshesi Muhtar Mankeev málim etti, dep habarlaıdy QazAqparat.
Prezıdent janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń úshinshi otyrysynyń aldynda Mankeev «Qazaqstan-2050» jalpulttyq qozǵalysy tarapynan birneshe joba júzege asyrylyp jatqanyna jetkizdi.
«Ózderińiz kórip otyrǵandaı, latyn álipbıine kóshýdi qoldaý úshin úlken bir kórmeni bastadyq. Kórme «Qazaq kitaptary» dep atalady. Ol 1929-1940 jyldary shyǵarylǵan kitaptardy qamtıdy. Biz aýqymdy zertteý jasap, 1500 kitapty taptyq. Qazirgi tańda 2 kórmede olar kórsetilgen. Jyldyń sońyna deıin bul ashyq kórme jalǵasady», - dedi ol.
Sonymen qatar M. Mankeev «Rýhanı jańǵyrý» jobalar tizilimi aıasynda «Kraýdsorsıng» úlken jobasy kirgenin atap ótti. Ol azamattyq bastamalar kartasy salasynda júzege asyp jatyr. Birinshi pılottyq joba Batys Qazaqstan oblysyndaǵy Oral qalasynda júzege asýda. Onyń basty maqsaty - jergilikti atqarýshy organdar men qoǵam arasyndaǵy kommýnıkatsııalyq kedergilerdi joıý nemese azaıtý.
«Qazirgi tańda jaqsy bastamalar túsýde. Óńirlerdi damytýǵa arnalǵan baǵdarlamalar shyǵyp jatyr. Biraq biz qoǵamnyń pikirin bilgen kezde, halyqtyń 70-80 paıyzy olardyń qandaı joba ekenin jáne qandaı nátıjelerge ákeletinin bilmeıdi eken. Sondyqtan biz veb-portal arqyly jobalar nemese baǵdarlamalar bastamasy bastalǵan kezde atqarýshy organdar sol jerge jarııalap, qoǵammen talqylasa degen ıdeıamen shyqtyq. Ol qoldaýǵa ıe boldy jáne «Rýhanı jańǵyrý» baǵdarlamasy aıasynda júzege asyrylatyn bolady, - dedi ulttyq komıssııa múshesi.
Bul rette ol rýhanı jańǵyrý týraly qoǵamdyq pikirdiń asa mańyzdy ekenin, baǵdarlama ishindegi kóp jaqsy bastamalardy halyq bilýi kerektigin qadap aıtty.
Eske sala keteıik, Prezıdent janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń úshinshi otyrysynda QR Prezıdenti Ákimshiliginiń basshysy-Ulttyq komıssııanyń tóraǵasy Ádilbek Jaqsybekov rýhanı jańǵyrý aıasynda osy kúnge deıin iske asyrylǵan jumystar jóninde de málimdedi.
