Kraýdfandıng: Qazaqstandyqtar ótirik muqtajdarǵa 6 mlrd teńge jınap bergen

ASTANA. KAZINFORM - Túrli kúmándi maqsattarǵa aqsha jınaýǵa 138 banktik karta (kraýdfandıngke) tartylǵan, dep habarlaıdy Qarjy monıtorıngi agenttiginiń baspasóz qyzmeti. 

Jalǵan kómek suraýshylarǵa 660 myńnan astam qazaqstandyq óz aqshalaryn joldaǵan.

Bul týraly QMA alańynda Dmıtrıı Malahovtyń tóraǵalyǵymen ótken Qylmystyq jolmen alynǵan kiristerdi zańdastyrýdyń (jylystatýdyń) aldyn alý jáne terrorızmdi qarjylandyrý men jappaı qyryp-joıý qarýyn taratý máseleleri jónindegi vedomstvoaralyq keńestiń kezekti otyrysy barysynda belgili boldy.

Jalpy jınalǵan qarjy somasy 6 mlrd teńgeni qurady, onyń 33% (2 mlrd) alaıaqtyq belgileri bar.

Áleýmettik jelilerde ujymdyq qarajat jınaýdyń qaýipteri jáne olardy odan ári maqsatsyz paıdalaný anyqtaldy.

QMA basshysy D. Malahov josyqsyz azamattar «em» jáne «jaǵdaıy tómen adamdarǵa kómek kórsetý» úshin qaıyrymdylyq qyzmeti men kómek kórsetý túrindegi qarajat jınaýdy kedergisiz jáne baqylaýsyz júzege asyratynyn atap ótti.

Olar aqshany jyljymaly jáne jyljymaıtyn múlikti satyp alýǵa, turmystyq shyǵyndarǵa, býkmekerlik keńselerde bás tigýge jáne sheteldegi qymbat páterlerdi jalǵa alýǵa jumsaıdy.

Janashyr azamattardyń jaqsy nıeti, «jalǵan» muqtajdar úshin ońaı tabysqa aınalýy múmkin.

Otyrysqa qatysýshylar – AHQO, qarjy retteýshileri jáne ekinshi deńgeıli bankterdiń ókilderi - kraýdfandıngtik qyzmetti retteý boıynsha zańnamalyq sharalardy ázirleý qajettigin atap ótti.

Kraýdfandıng – bul jobalardy, bastamalardy jáne startaptardy qarjylandyrý úshin qoldanylatyn aqsha jınaýdyń ınnovatsııalyq tásili.