Krannan sý ishý úshin birneshe mınýt aǵyzýdyń qajeti joq - Sý mınıstrligi

ASTANA. KAZINFORM — Sý ishý úshin krandy birneshe mınýt ashyq qaldyrýdyń qajeti joq. Aldyn ala sý aǵyzý tek sanıtarlyq-epıdemıologııalyq tekserý úshin synama alynatyn jaǵdaıda ǵana kerek.

Sýdyń aǵysyn qansha ýaqyt aǵyzý qajet ekeni zertteý maqsatyna baılanysty. Mysaly, sý sapasyna áser etetin materıaldardy zertteý úshin sýdy aldyn ala aǵyzbaı-aq synama alý kerek.

Al hımııalyq tepe-teńdikti anyqtaý úshin sýdy 2–3 mınýttaı aǵyzyp jiberý jetkilikti.

Sýdaǵy mıkrobıologııalyq kórsetkishterdi anyqtaý úshin metall krandardy aldymen otqa ustap zararsyzdandyrý kerek, al plastık krandardy arnaıy quralmen dezınfektsııalaý qajet. Mundaı jaǵdaıda sýdy krandy tolyq ashyp, keminde 10 mınýt aǵyzý kerek.

«Іshýge arnalǵan sýdy aldymen aǵyzyp jiberýdiń qajeti joq. Bul – sýdy beker ysyrap etý. Mınıstrlik kerisinshe, sýdy únemdep paıdalanýǵa shaqyrady. Osy maqsatta arnaıy ádistemelik usynystar ázirlengen. Olardy saqtaý arqyly alty adamnan turatyn otbasy jylyna 35 myń lıtrge deıin sý únemdeı alady. Qazir bul usynystardy el kólemindegi qoǵamdyq oryndarǵa taratý jumysy júrgizilip jatyr», – dedi Sý resýrstary jáne ırrıgatsııa mınıstrligi Sýdy únemdeý tehnologııalaryn damytý departamentiniń dırektory Berikbol Mándibaev.

Usynylǵan sharalar qatarynda mynalar bar:

• kir jýatyn jáne ydys jýatyn mashınalardy tolyq júktememen paıdalaný;
• avtomatty sensorly krandar ornatý;
• dárethanada eki rejımdi sý shyǵarý tetikterin ornatý;
• krandarǵa aeratsııalyq saptamalar qoıý;
• krandardyń tehnıkalyq jaǵdaıyn turaqty tekserip turý jáne aqaý ne aǵyp jatqan jerlerdi ýaqytyly jóndeý.

Aıta keteıik, Jambyl oblysynda Jańaótkel aýyly taza aýyz sýmen qamtamasyz etildi.