Kran-Montanadaǵy órtten qaza tapqandar sany 41 adamǵa jetti
ASTANA. KAZINFORM – Shveıtsarııanyń Kran-Montana taý shańǵysy kýrortynda ornalasqan bardaǵy órt saldarynan qaza tapqandar sany 41 adamǵa jetti. Bul týraly Euronews habarlaıdy.
Jańa jyl túni Le Constellation barynda bolǵan órt kezinde aýyr kúıik alǵan 18 jastaǵy jasóspirim bir aı boıy dárigerlerdiń baqylaýynda bolǵanymen, onyń ómirin saqtap qalý múmkin bolmady. Ol 31 qańtar kúni Tsıýrıh qalasyndaǵy aýrýhanada kóz jumǵan.
Vale kantonynyń prokýrory Beatrıs Pıııý AFP agenttigine bergen málimdemesinde osy derekti rastady. Onyń aıtýynsha, qaıǵyly oqıǵa qurbandarynyń jalpy sany 41 adamǵa jetken. Sonymen qatar, tergeý barysyna qatysty jańa aqparat ázirge jarııalanbaıtyny aıtyldy.
Qaza tapqandardyń jasy 14 pen 39 jas aralyǵynda. Olardyń basym bóligi – jasóspirimder. Tek tórt adam ǵana 24 jastan asqan. Qurbandar arasynda 23 Shveıtsarııa azamaty jáne basqa elderdiń 18 azamaty bar, onyń ishinde segizi – Frantsııa azamattary.
Atalǵan órt 2026 jylǵy 1 qańtarǵa qaraǵan túni shyqqan. Oqıǵa saldarynan 100-den astam adam jaraqat alǵan.
Aldyn ala tergeý derekterine sáıkes, órt shampan bótelkelerine salynǵan bengal ottarynan shyqqan. Tóbeni qaptaǵan akýstıkalyq kóbik materıal tez tutanyp, birneshe sekýnd ishinde jalyn búkil bólmeni sharpyǵan. Nátıjesinde kelýshiler ǵımarattan shyǵa almaı, ot qursaýynda qalǵan.
Shveıtsarııa bıligi bardaǵy tóbe jabynynyń qaýipsizdik talaptaryna saı bolǵan-bolmaǵanyn, sondaı-aq mekemede ashyq ot kózderin paıdalanýǵa ruqsat berilgen-berilmegenin tekserip jatyr. Belgili bolǵandaı, órt qaýipsizdigine qatysty sońǵy tekseris bul mekemede 2019 jyldan beri júrgizilmegen.
Qazirgi tańda is boıynsha 4 adam tergelip jatyr. Shveıtsarııa prokýratýrasy bar ıeleri – Frantsııa azamattary Jak Morettı men Djessıka Morettıge qatysty qylmystyq is qozǵady. Olar abaısyzda adam ólimine ákelý, abaısyzda densaýlyqqa zııan keltirý jáne órt shyǵarý baptary boıynsha kúdikke ilingen.
12 qańtarda Vale aımaqtyq soty Jak Morettıdi sotqa deıin úsh aı merzimge qamaýǵa alý týraly sheshim shyǵarǵan. Alaıda 23 qańtarda bul sheshim kúshin joıyp, ol kepilmen bosatylǵan.
Sondaı-aq qylmystyq tergeý aýqymy keńeıtilip, is fıgýranttary qataryna Kran-Montana mýnıtsıpalıtetiniń qaýipsizdik qyzmetiniń taǵy eki qyzmetkeri engizildi.