Kran qulaǵan: astanalyq jumysshy ólimine qatysty qylmystyq is qozǵaldy

ASTANA. KAZINFORM — Astanada qurylys alańynda mert bolǵan jumysshy ólimine qatysty qylmystyq is qozǵaldy. Bul týraly qalalyq polıtsııa departamentiniń baspasóz qyzmeti habarlaıdy.

— 18 shildede saǵat 20:00 shamasynda qurylys alańynda kran qulady. Kran ishinde bolǵan er adam alǵan jaraqattan oqıǵa ornynda kóz jumdy. Qurylys jumysyn júrgizý kezinde qaýipsizdik erejesin buzý faktisi boıynsha qylmystyq is qozǵaldy, — delingen resmı habarlamada.

Qazir qaıǵyly oqıǵanyń mán-jaıyn anyqtaý maqsatynda tergeý júrgizilip jatyr. 

Buǵan deıin Astanada qurylys alańynda kran aýdarylyp, jumysshynyń mert bolǵany týraly habarlaǵan edik. 

Aıta ketsek, elordadaǵy Turar Rysqulov kóshesi 18/5 úı mekenjaıynda ornalasqan «Abyroı» turǵyn úı kesheni aýmaǵynda qatty jel saldarynan kran aýdarylyp qalǵan. 

Sondaı-aq Aqmola oblysynda montajdaý jumystary kezinde bolǵan apattan eki adamnyń qaza tapqanyn jazǵanbyz.