Krakovta oq atqan kúdiktiniń úıinen úsh adamnyń máıiti tabyldy
ASTANA. KAZINFORM — Polshanyń Ostrovets-Sventokshıskıı qalasynda polıtsııa 7 qarashada Krakov ortalyǵynda oq atqan er adamnyń úsh týysynyń máıitin tapty. Bul týraly Kazinform agenttigi Polsha radıosyna silteme jasap habarlady.
Qaza tapqandar — 24 jastaǵy kúdiktiniń 53 jastaǵy ákesi, 52 jastaǵy anasy jáne 21 jastaǵy qaryndasy. Olardyń máıiti 7 qarasha kúni keshke kúdikti turǵan turǵyn úıdiń páterinen tabylǵan.
Aldyn ala málimet boıynsha, úsheýi de oq jaraqatynan kóz jumǵan. Máıitter sot-medıtsınalyq saraptamaǵa jiberildi. Tintý kezinde polıtseıler páterden jeti atys qarýyn tárkiledi.
Qaza tapqandardyń tabylǵany týraly alǵash ret Polsha premer-mınıstri Donald Týsk kúshtik qurylym ókilderimen ótken keńeste málimdedi. Keıin polıtsııa marqumdardyń kim ekenin rastady.
Arnaıy operatsııaǵa baılanysty turǵyn úıdiń adamdary ýaqytsha evakýatsııalandy. Operatsııaǵa terrorızmge qarsy kúres bólimsheleriniń qyzmetkerleri de tartyldy. Tekserý aıaqtalǵan soń turǵyndar páterlerine qaıta oraldy.
Tergeýshiler kúdiktiniń otbasy músheleriniń ólimine qatysty mán-jaıdy anyqtap, bul oqıǵanyń Krakovtaǵy atyspen baılanysy bar-joǵyn tekserip jatyr.
Eske salaıyq, buǵan deıin Krakovtyń Bas bazar alańynda bolǵan atystan keıin qalada aza tutý jarııalanǵany habarlanǵan edi. Oqıǵa saldarynan alty adam qaza taýyp, taǵy 16 adam jaraqat alǵan. Zardap shekkenderdiń arasynda eki polıtseı bar. Shabýyl jasaǵan kúdikti ustaý kezinde jaralanyp, aýrýhanaǵa jetkizilgen.
Qasym-Jomart Toqaev Krakov qalasyndaǵy atys saldarynan adamdardyń qaza tabýyna baılanysty Polsha Prezıdenti Karol Navrotskııge kóńil aıtty.