Krakov ortalyǵynda oq atqan 24 jastaǵy er adam aýrýhanada qaıtys boldy
ASTANA. KAZINFORM — Polsha polıtsııasy Krakov qalasynyń ortalyǵynda oq atqan 24 jastaǵy er adamnyń qaıtys bolǵanyn habarlady, dep jazady Kazinform BBC-ge silteme jasap.
7 qarashada Polsha azamaty, boljam boıynsha, ásire ońshyl ıdeologııanyń yqpalynda bolǵan er adam Krakovtyń ortalyq alańynda oq jaýdyrǵan. Atystan alty adam — eki er adam men tórt áıel qaza tapty. Taǵy 16 adam jaralandy. Olardyń arasynda Aýstrııa, Germanııa, Portýgalııa, Reseı jáne Ulybrıtanııa azamattary bar.
Polıtsııa shabýyldaýshyǵa qarsy oq atyp, ony ustady. Keıin onyń úıinen úsh adamnyń — ata-anasy men ápkesiniń máıiti tabyldy. Elde eki kúndik aza tutý jarııalandy.
Polsha Ádilet mınıstri Valdemar Jýrek tergeýmen «terrorızm qylmystaryna» mamandanǵan bólim aınalysyp jatqanyn málimdedi. Jýrek X áleýmettik jelisindegi paraqshasynda Uıymdasqan qylmys pen sybaılas jemqorlyqqa qarsy kúres basqarmasy «alty adamdy atys qarýymen óltirý jáne kóptegen adamdy óltirýge oqtalý» isin tergep jatqanyn jazdy.
— Qoldanylǵan quqyqtyq saralaýǵa sáıkes, qylmysker kóp adamdy qatty qorqytý maqsatynda áreket etken. Bul terrorızm qylmysy retinde qarastyrylady, — dep tolyqtyrdy ol.
Eske salaıyq, buǵan deıin Qasym-Jomart Toqaev Krakov qalasyndaǵy atys saldarynan adamdardyń qaza tabýyna baılanysty Polsha Prezıdenti Karol Navrotskııge kóńil aıtty.