QR Jumyldyrý daıyndyǵy zańyna ózgerister engizildi
NUR-SULTAN. QazAqparat - QR Parlamenti Senatynda «Qazaqstan Respýblıkasynyń keıbir zańnamalyq aktilerine jumyldyrý daıyndyǵy jáne jumyldyrý máseleleri boıynsha ózgerister men tolyqtyrýlar engizý týraly» QR Zańynyń jobasy qabyldandy, dep habarlaıdy QazAqparat tilshisi.
«Ýákiletti organǵa jumyldyrý daıyndyǵy men jumyldyrý salasyndaǵy memlekettik baqylaý quzyretin berý kózdeledi. Jumyldyrý daıyndyǵy salasyndaǵy buzýshylyqtar úshin ákimshilik jáne qylmystyq jaýapkershilik qoldanatyn jaǵdaılar anyqtalady. Keıbir memlekettik organdardyń fýnktsııalary naqtylanady», - dedi dedi QR Ulttyq ekonomıka mınıstri Rýslan Dálenov Senattyń plenarlyq otyrysynda.
Odan bólek, jumyldyrý daıyndyǵy salasyndaǵy ýákiletti organǵa saqtandyrý qoryn qurý jáne saqtaý salasyndaǵy qyzmetti úılestirý quzyreti beriledi.
«Bul – qarý-jaraq pen áskerı tehnıka buıymdaryna, asa mańyzdy azamattyq ónimge tehnıkalyq qujattamanyń, sondaı-aq qaýiptiligi joǵary nysandarǵa, halyqtyń tynys-tirshiligin qamtamasyz etý júıelerine jáne ulttyq ıgilik bolyp sanalatyn nysandarǵa jobalyq qujattamanyń saqtandyrý qory», - dep túsindirdi mınıstr.
Memlekettik materıaldyq rezervti jetildirý boıynsha jańa tásilder engizilýde:
- Densaýlyq saqtaý mınıstrliginiń vedomstvolyq baǵynysty uıymy (Ulttyq ekspertıza ortalyǵy) memlekettik materıaldyq rezervke jetkizý kezinde jáne olardy saqtaý kezeńinde taýarlardyń sapasyn baqylaýdy júzege asyrady;
- memlekettik materıaldyq rezerv taýarlaryn kádege jaratý boıynsha quzyreti engiziledi;
- materıaldyq qundylyqtardy jańartýdy saqtaý pýnktterin júzege asyrady;
- materıaldyq qundylyqtar basqa memlekettik organdardyń balansyna tegin beriledi;
- jumyldyrý rezerviniń medıtsınalyq maqsattaǵy dárilik zattary men buıymdaryn jetkizý, saqtaý jáne jańartý fýnktsııalary densaýlyq saqtaý salasyndaǵy ýákiletti organnyń jáne tegin medıtsınalyq kómektiń kepildik berilgen kóleminde qyzmet etetin biryńǵaı dıstrıbıýtorǵa oryndalýy júkteledi.
