Kir jýǵysh mashınany jylyjaıǵa aınaldyrǵan: ShQO-da esirtki saqtan turǵyn ustaldy
ASTANA. KAZINFORM — Shyǵys Qazaqstan oblysynyń Ulan aýdanynda polıtseıler esirtki quramdy ósimdikterdi zańsyz ósirý deregin anyqtady, dep habarlaıdy Polisia.kz.
Zańsyz esirtki aınalymyna qarsy baǵyttalǵan «Qarasora-2026» jedel-profılaktıkalyq is-sharasy barysynda Tavrıcheskoe aýylyndaǵy jeke turǵyn úıden esirtki plantatsııasy tabyldy.
Tergeý málimetinshe, 41 jastaǵy aýyl turǵyny ınternet arqyly sora tuqymdaryn satyp alyp, olardy ósirýmen aınalysqan. Esirtki ósimdikterin kútip-baptaý úshin ol eski kir jýǵysh mashınany qoldan jasap, shaǵyn jylyjaı retinde paıdalanǵan.
Tintý barysynda Shyǵys Qazaqstan oblysy prolıtsııa departamentiniń esirtki qylmysyna qarsy is-qımyl basqarmasy men Ulan aýdandyq polıtsııa bóliminiń krımınaldyq polıtsııa qyzmetkerleri 34 túp sora ósimdigin, esirtki tutynýǵa arnalǵan qurylǵyny, sondaı-aq garajdan keptirilgen esirtki zatynyń iri kólemin tárkiledi.
Saraptama qorytyndysyna sáıkes, tárkilengen ósimdikterdiń barlyǵy sora (kannabıs) bolyp shyqqan. Onyń jasyl kúıindegi jalpy salmaǵy 50,94 gramm, al keptirilgen marıhýananyń salmaǵy 16 keli boldy.
Qazirgi ýaqytta atalǵan derek boıynsha sotqa deıingi tergep-tekserý amaldary júrgizilip jatyr.
Polıtsııa esirtki quramdy ósimdikterdi zańsyz ósirý qylmystyq jaýapkershilikke ákep soǵatynyn eske salady. Vedomstvo mundaı quqyq buzýshylyqtardyń aldyn alý jáne jolyn kesý baǵytyndaǵy jumystar turaqty baqylaýda ekenin atap ótti.
Buǵan deıin Tájikstan–Aýǵanstan shekarasynda 1,5 tonnadan astam esirtki tárkilengeni týraly jazǵan bolatynbyz.
