QR Joǵary Soty jańa kodekstiń jobasyn ázirledi
QR Joǵary Sotynyń azamattyq jáne ákimshilik isteri jónindegi sot alqalarynyń sýdıalary qatarynan qurylǵan jumys toby osy kodekstiń jobasyn ázirledi.
Joǵary Sot sýdıasy Baǵlan Maqulbekovtiń aıtýynsha, ondaǵan jyldar boıy jeke-quqyqtyq jáne jarııalylyq quqyqtyq qatynastarda týyndaǵan ister azamattyq ister júrgizý kodeksiniń tártibimen qaralyp kelgen. Jeke azamattardyń quqyqtarymen qatar, múliktik, kóliktik emes qatynastardan týyndaıtyn daýlar, salyq salý, kedendik, banktik qatynastardan, jerdi ıelený qatynastarynan týyndaıtyn, sol sııaqty densaýlyq saqtaý, antımonopolııalyq retteý jáne basqa da quqyqtyq qatynastar azamattyq kodekstiń aıasynda birge qaralyp keldi.
«Elimizdiń «2010-2020 jyldarǵa arnalǵan QR Quqyqtyq saıasat tujyrymdamasyna sáıkes, azamattyq ister men ákimshilik ister júrgizý protsesin ekige bólý máselesi kóterilgen bolatyn. Osy baǵytta bizde azamattyq isterdi júrgizý kodeksiniń jańa jobasy men ákimshilik protsessýaldyq kodeksiniń jańa jobasy daıyndaldy. Qazirgi ýaqytta qoǵamdyq qatynastardyń salalary kóbeıip ketti. Osy isterdi ýaqytynda ári ádiletti sheshý úshin, sonan keıin ákimshilik-quqyqtyq qatynastarǵa qatysatyn sýbektilerdiń quqyqtary men bostandyqtaryn oryndaý úshin osy ákimshilik protsessýaldyq kodeksti qabyldaý qajettigi týyndap otyr. Qazir kodekstiń jobasy daıyn boldy deýge bolady. Endi ol biraz pysyqtalǵannan keıin, kópshiliktiń nazaryna usynylatyn bolady», - deıdi ol.
Azamattyq isterdi júrgizý kodeksi men ákimshilik protsessýaldyq kodeksiniń aıyrmashylyǵy sonda - Azamattyq isterdi júrgizý kodeksi boıynsha tek qana jeke quqyqtyq qatynastar qaralady, ol jerde talapkerler men jaýapkerler jáne basqa úshinshi tulǵalar protsesske qatysa alady. Al ákimshilik protsessýaldyq kodeks boıynsha qaralatyn iske ákimshilik talapker men ákimshilik jaýapker qatysady. Onda memlekettik organ men laýazymdy tulǵalalardyń áreketteri qaralady.
«Azamattyq protsess boıynsha, eki jaq teń quqyly jáne sotta jaryspaly prıntsıpterin qoldanýy múmkin, al ákimshilik protsessýaldyq kodeks boıynsha, quqyqtyq normatıvtik aktini qabyldaǵan organ bul aktiniń qabyldanýyna sebep bolǵan faktorlardy sot otyrysynda dáleldeýi mindetti. Eki kodekstiń basty aıyrmashylyǵy osynda», - dep atap ótti B.Maqulbekov.
Joba ákimshilik sot isin júrgizýdi quqyqtyq retteýdiń búkilálemdik tájirıbesine sáıkes ázirlengen. Atap aıtqanda, Germanııa, Latvııa, Lıtva, Ázerbaıjan jáne taǵy basqa elderdiń tájirıbesi zerdelendi. Kodeks jobasy 6 bólimnen, 43 taraýdan jáne 338 baptan turady. Joba jaqynda Joǵary Sottyń resmı saıtynda jarııalanady.
