QR Joǵary aýdıtorlyq palatasynda jańa memlekettik aýdıtorlar irikteldi

ASTANA. KAZINFORM — 2025 jyldyń I toqsany boıynsha memlekettik aýdıtorlardy sertıfıkattaý nátıjeleri qorytyndylandy, dep habarlaıdy palatanyń baspasóz qyzmeti.

Atalǵan kezeńde Sertıfıkattaý jónindegi ulttyq komıssııanyń úsh otyrysy ótti.

Jalpy sertıfıkattaý eki kezeńnen turady: Býhgalterlik esep, memlekettik jáne kvazımemlekettik sektor úshin eseptilikti daıyndaý, sáıkestik pen tıimdilik aýdıti, sondaı-aq kásibı etıka negizderi boıynsha test tapsyrmalary men keısterden turatyn biliktilik emtıhany.

Úmitkerler Ulttyq komıssııada áńgimelesýden ótedi, onda irikteýge qatysýshylardyń kásibı daıyndyq deńgeıi, tájirıbesi men jeke qasıetteri baǵalanady.

Nátıjesinde:

— 1 úmitker joǵary sanatty memlekettik aýdıtor biliktiligin aldy;

— 21 úmitkerge memlekettik aýdıtor biliktiligi berildi;

— 4 úmitkerge joǵary sanatty memlekettik aýdıtor biliktiligin berýden bas tartyldy;

— 27 úmitkerge memlekettik aýdıtor biliktiligin berýden bas tartyldy;

— 1 memlekettik aýdıtor sertıfıkaty komıssııa sheshimimen keri qaıtaryldy.

— Nátıjeler úmitkerlerge qoıylatyn talaptardyń joǵary deńgeıde ekenin jáne aýdıt salasyndaǵy júıeli kásibı damýdyń mańyzdylyǵyn kórsetedi. Joǵary aýdıtorlyq palata memlekettik aýdıtorlardy ashyq, obektıvti jáne sapaly irikteýdi qamtamasyz etý baǵytyndaǵy jumysyn jalǵastyrady, — delingen QR Joǵary aýdıtorlyq palatasynyń habarlamasynda.

Budan buryn Qazaqstanda elektr energetıkasy salasyndaǵy memlekettik saıasatty iske asyrý tıimdiligine júrgizilgen aýdıt aıaqtaldy. Onyń qorytyndylary Álıhan Smaıylovtyń tóraǵalyǵymen ótken Joǵarǵy aýdıtorlyq palatanyń otyrysynda qaraldy.