QR Joǵarǵy soty jemqor sýdıalardy anyqtaýdy kúsheıtedi

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi jáne QR Joǵarǵy soty ekijaqty memorandýmǵa qol qoıdy. Atalǵan qujat aıasynda jemqorlyqqa qarsy kúres sharalaryn kúsheıtý kózdelgen, dep xabarlaıdy QazAqparat tilshisi.

Sybaılas jemqorlyqqa qarsy is-qımyl ulttyq bıýrosy tóraǵasynyń orynbasary Shyńǵys Qabdolanyń aıtýynsha, memorandým keshe, 21 aqpanda rásimdelgen bolatyn. Alaıda QR Joǵarǵy sotynyń ishki qaýipsizdik qyzmetimen birlesken jumys ekijaqty qujatty rásimdeýge deıin bastalyp ketken.

«Máselen, Almaty qalasynda Áýezov aýdandyq sotynyń sýdıasy A.Shteınke 10 myń dollar kóleminde para alý ústinde ustalǵan bolatyn. Bul da birlesken jumystyń nátıjesi. Jalpy, biz osyndaı memorandýmdardy rásimdeý arqyly basqa da memlekettik organdardyń ishki qaýipsizdik qyzmetterin kúsheıtýdi kózdeımiz. Osylaısha, atalǵan qurylymdardyń mártebesi de kóteriledi», - dedi Sh.Qabdola Astanada ótken baspasóz máslıhatynda.

Al QR Joǵary sotynyń ishki qaýipsizdik jáne jemqorlyqtyń aldyn alý bóliminiń meńgerýshisi Qaırat Bıjanovtyń sózine qaraǵanda, birlesken jumystyń aıasynda san alýan sharalar atqarylady. Sonyń ishinde jemqorlyqpen ashyq kúres pen profılaktıkalyq jumystar bar.

«Birlesken jumys aıasynda biz eń aldymen jemqorlyqqa qarsy kúresti ashyq kórsetetin bolamyz. Sosyn sot salasyndaǵy jemqorlyqqa qatysty buqaralyq aqparat quraldaryna shyqqan materıaldarǵa monıtorıng júrgizemiz. Qoǵamdyq pikirdi de qadaǵalap otyramyz. Árıne, jemqorlyq áreketterdiń aldyn alý sharalaryna basymdyq beretin bolamyz», - dep atap kórsetti Q.Bıjanov.

Aıta keteıik, búgingi brıfıngte Sybaılas jemqorlyqqa qarsy is-qımyl ulttyq bıýrosy tóraǵasynyń orynbasary Sh.Qabdola tórt sýdıanyń jumystan bosatylǵanyn jetkizdi. Olardyń barlyǵy QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń usynysymen jumystan bosatylǵan bolatyn.