QR Joǵarǵy Soty sýdıalarǵa qoıylatyn talaptardy kúsheıtpek
«Tájirıbe sýdıalardyń kásibı bilimin baǵalaý ınstıtýtynyń tıimdiligin kórsetip otyr. Sonymen birge, baǵalaýdyń qoldanystaǵy tetigi qaıta qaraýdy talap etýde», - dedi QR Joǵarǵy Sotynyń sýdıasy Aqyltaı Qasymov «Qazaqstan Respýblıkasynyń keıbir konstıtýtsııalyq zańdaryna ózgerister engizý týraly» QR Konstıtýtsııalyq zańynyń jobasy boıynsha baıandama jasaý kezinde.
Onyń sózine qaraǵanda, zańnamaǵa sáıkes, Sot jıýrıi baǵalaýynyń nátıjesi boıynsha sýdıaǵa teris qorytyndy berilse sýdıanyń biliktiligin arttyrý týraly jáne bir jyl ótken soń kásibı qyzmetin qaıtadan baǵalaýdy júrgizý týraly sheshim qabyldanatyn.
Qaıta baǵalaýda teris nátıje bolǵan jaǵdaıda ǵana sýdıanyń atqaryp jatqan qyzmetine sáıkes kelmeıtindigin taný týraly sheshim engiziletin. Osy arqyly, atqaryp jatqan laýazymyna sáıkes kelmeıtinin kýálandyratyn sýdıanyń kásibı qyzmetiniń birinshi teris nátıjesi ony jumysynan bosatýǵa negiz bolmaıtyn.
«Osyǵan baılanysty sýdıalar korpýsynyń sapalyq quramyn odan ári arttyrý, kásibı biliktiligin baǵalaý men ony kóterýge yntalandyrý tetigin jetildirý, isterdi qaraý kezinde zańdylyqty nyǵaıtý úshin jaýapkershilikti arttyrý maqsatynda sýdıanyń kásibı qyzmetin merzimdi baǵalaýdyń teris nátıjesi alynǵan jaǵdaıda, onyń kásibı qyzmetine qaıtadan baǵalaý júrgizbesten sýdıany laýazymynan bosatý usynylady», - dedi A. Qasymov.
Munymen qosa, zań jobasynda Sot jıýrıi sýdıany basqa sotqa nemese basqa mamandanýǵa aýystyrý týraly sheshim qabyldaǵan jaǵdaıda, sýdıalardy basqa sotqa konkýrs ótkizbesten aýystyrý tártibin reglamentteý eskerildi.
Talqylaýlardan keıin palata depýtattary zań jobasyn maquldady.
