QR Joǵarǵy Soty Chelahtyń isin aldyn ala qaraý kúnin taǵaıyndady
ASTANA. 28 tamyz. QazAqparat - 2013 jyldyń 02 qyrkúıeginde Qazaqstan Respýblıkasy Joǵarǵy Sotynyń qylmystyq ister jónindegi qadaǵalaýshy sot alqasy sottalǵan Vladıslav Chelahqa qatysty zańdy kúshine engen sot aktilerin qaıta qaraý týraly advokat S.K. Sarsenovtiń ótinishin aldyn ala qaraýǵa kiristi, dep habarlady QR Joǵarǵy Sotynyń baspasóz qyzmetinen.
Qylmystyq is júrgizý zańnamasyna sáıkes, qadaǵalaý satysy ótinishti aldyn ala qaraý nátıjeleri boıynsha sot qadaǵalaýy tártibimen is boıynsha is júrgizýdi qozǵaý úshin negizderdiń bar ekeni nemese joq ekeni týraly máseleni sheshetin bolady.
Budan buryn habarlanǵandaı, mamandandyrylǵan aýdanaralyq áskerı sottyń 2012 jylǵy 11 jeltoqsandaǵy úkimimen áskerı qyzmetshi V. Chelah QR QK-nyń 96-babynyń 2-bóliginiń «a,v,d,k,n,», 172-babynyń 1-bóliginde, 175-baptyń 2-bóligi. «b, v» tarmaqtarynda, 255-baby 3-bóliginiń «a» tarmaǵynda, 251-babynyń 1-bóliginde, 387-babynyń 2-bóliginde, 145-babynyń 2-bóliginde kózdelgen qylmystardy jasaǵany úshin kináli dep tanylǵan bolatyn. Qazirgi ýaqytta ol erekshe rejimdegi túzeý kolonııasynda ómir boıy bas bostandyǵynan aıyrý túrindegi jazasyn ótep jatyr.
Bul qylmystyq is apellıatsııalyq jáne kassatsııalyq tártiptermen qaraldy. Qazaqstan Respýblıkasy Joǵarǵy Sotynyń qylmystyq ister jónindegi apellıatsııalyq jáne kassatsııalyq sot alqalarynyń qaýlylarymen úkim ózgerissiz, al advokattyń shaǵymy qanaǵattandyrýsyz qaldyryldy.
