QR Joǵarǵy Soty boryshkerlerdi baspanadan zańsyz aıyrý faktilerin anyqtady
Bul týraly búgin Astanada QR Joǵarǵy Sotynyń sýdıasy Núrııa Sısenova aıtty.
«Zańda sot oryndaýshysy atqarýshylyq óndiristi qozǵaǵannan keıin boryshkerdiń múlkin, onyń ishinde aqsha qarajatyn, jyljymaıtyn jáne jyljymaly múlkin anyqtaýmen baılanysty barlyq is-qımyldy júrgizýi tıis delingen. «Atqarýshylyq óndiris týraly» Zańnyń-55 baby talaptaryna sáıkes, atqarýshylyq qujat boıynsha óndirip alýǵa birinshi kezekte, boryshkerdiń aqshalaı qarajaty jatady. Boryshkerdiń qaryzdy jabýǵa jeterlikteı aqshalaı qarajaty bolmaǵan jaǵdaıda, oǵan tıesili basqa múlikti óndirip alýǵa bolady. Basqa múlki de jetkiliksiz bolǵanda, boryshkerdiń atqarýshylyq qujatqa sáıkes óndiriletin kólemnen quny asyp túsetin múlkin óndirip alýǵa bolady. Alaıda, tájirıbe kórsetip otyrǵandaı, bul talaptar sot oryndaýshylary tarabynan ár ýaqytta saqtala bermeıdi», - dedi N.Sısenova.
Máselen, sýdıanyń aıtýynsha, sottyń kúshine engen sheshimimen azamattan shaǵyn nesıelik uıymnyń paıdasyna 2 mln. 200 myń teńge kóleminde qaryz óndirip alynǵan. 2014 jyldyń qańtarynda atqarýshylyq óndiris qozǵalǵan. Jeke sot oryndaýshysy azamattyń aqsha qarajatynyń bar-joǵyn anyqtaǵan. Onyń bolmaýyna baılanysty, 2015 jyldyń 9 shildesinde jeke sot oryndaýshysy azamatqa tıesili turǵyn úıdi óndirip alý týraly qaýly shyǵarǵan. Bul sheshimdi sot sanktsııalaǵan. Joǵarǵy Sotta atalǵan isti qaraý barysynda QR Konstıtýtsııasynyń 25-baby talaptarynyń buzylǵandyǵy anyqtalǵan.
Aıta keteıik, bul jaıynda ol elordada ótip jatqan «Sot aktilerin zańnamalyq oryndalýyn qamtamasyz etý. Jeke sot oryndýshylary ınstıtýtyn odan ary damytý» taqyrybyndaǵy halyqaralyq konferentsııada málim etti.
