QR Joǵarǵy Bas qolbasshysy kýbogyna jekpe-jek saıystan ashyq týrnır ótedi
ASTANA. QazAqparat - 12-13 qarasha aralyǵynda alǵash ret Qazaqstan Respýblıkasynyń Tuńǵysh Prezıdenti kúnine oraı «Dáýlet» sport kesheninde erler arasynda jekpe-jekten Qazaqstan Respýblıkasy Joǵarǵy Bas qolbasshysynyń kýbogyna I respýblıkalyq ashyq týrnıri ótedi.
Tuńǵysh Prezıdent kúnine oraı uıymdastyrylatyn jarysqa respýblıkanyń ár óńirinen jáne kúshtik qurylymdardan jasaqtalǵan 55, 60, 65, 70, 75, 80, 85, 90 jáne 90 keliden joǵary 9 túrli salmaq dárejesinde 25 komanda synǵa túsip, myqtylardy anyqtaıtyn bolady. Atalǵan dúbirli dodany uıymdastyrýǵa Qazaqstan Respýblıkasy Mádenıet jáne sport mınıstrligi Sport jáne dene shynyqtyrý komıteti jáne «Jekpe-jek saıystan búkilqazaqstandyq qaýymdastyǵy» uıytqy bolyp otyr.
Jarystyń saltanatty ashylý rásimi 12 qarasha kúni elordadaǵy «Dáýlet» sport kesheninde ótedi. Dodanyń ashylý rásimine Qazaqstan Respýblıkasy Prezıdenti Ákimshiligi men Úkimet ókilderi, kúshtik qurylym organdarynyń birinshi basshylary men Parlament depýtattary, sport komıtetteriniń jetekshileri, sondaı-aq jekpe-jek túrlerinen respýblıkalyq sport uıymdarynyń ókilderi men buqaralyq aqparat quraldary shaqyryldy.
13 qarasha kúni ár túrli salmaq dárejesi boıynsha jáne komandalyq jáne jeke kórsetkishter boıynsha jeńimpazdary marapattaý rásimi ótedi.
