QR Jazýshylar odaǵynyń mereıtoıy qazaqtyń máńgi el bolýynyń basty nyshany - Nurlan Orazalın (FOTO)
Saltanatty sharada Almaty qalasynyń ákimi Ahmetjan Esimov, Qazaqstannyń halyq jazýshysy, Memlekettik syılyqtyń laýreaty Oljas Súleımenov, KSRO-nyń halyq ártisi, Memlekettik syılyqtyń laýreaty Asanáli Áshimov, Qazaqstan Ǵylym akademııasynyń prezıdenti, akademık, Memlekettik syılyqtyń laýreaty Murat Jurynov sóz sóıledi.
Qazaqstan Respýblıkasy Parlamenti Senatynyń depýtaty, Qazaqstan Jazýshylar odaǵy basqarmasynyń tóraǵasy Nurlan Orazalın qazaq qalamgerleriniń basyn biriktirip otyrǵan úlken ınstıtýt jaıly óz pikirin bildirdi.
«Azattyqqa qol jetken alǵashqy kúnnen bastap, álemdik ıntegratsııaǵa erkin aralasyp, óz shyndyǵyn ózi dáleldep, óz aqıqatyn anyqtap berer qazaq eliniń qazirgi tańdaǵy qurandaı kórip áspettegen urany jalǵyz, ol - táýelsizdik. El Prezıdenti Ulytaý tórinde suhbat bergende elimizdiń eń joǵary jetistigi - táýelsizdik dep beker aıtpaǵan. Táýelsizdik qandaı qymbat bolsa, sóz de sondaı qymbat. Qabyrǵaly halqymyz sózge toqtap, ultaralyq qatynasty da sózben retteýge daǵdylanǵan el. Sol ónerdiń kózindeı bolǵan jazýshylar odaǵyna bıyl 80 jyl tolyp otyr. Búgingi mereke Nursultan Nazarbaevtyń tikeleı basshylyǵymen júzege asyryla bastaǵan máńgilik el bolýdyń basty nyshany bolyp otyrǵan til toıy», - dedi N.Orazalın.
Halyq qalaýlysy adamzattyń jazýshysy Shyńǵys Aıtmatovtyń Jazýshylar odaǵyna qatysty aıtqan sózin keltire ketti.
«20 ǵasyrdyń jarshysyndaı bolǵan Aıtmatov Qazaqstan Jazýshylar odaǵyn zamannyń joıqyn synyna tótep berip, jer silkinisinen aman qalǵan Alataýdyń shyńyna balaǵan. Qazaq jazýshylary, qolyna qalam ustaǵan qalamger qaýymy da ýaqyt kóshimen býyny bekip, bulshyq eti shyńdaldy. Elimizdiń rýhanı ómiriniń qara shańyraǵyna aınaldy. Qazaq qalamgerleri qazaq pen ǵalam aldyndaǵy adal mindetterin adal atqarý ústinde, olar qazaqtyń birligi men tutastyǵyn qamtamasyz etý jolynda árdaıym aldyńǵy lekten kórinip keledi», - dedi N.Orazalın.