QR jańa Úkimeti jumysynyń birinshi 100 kúni: el turǵyndarynyń pikiri
ASTANA. 28 jeltoqsan. QazAqparat - 2012 jyldyń 20-25 jeltoqsan kúnderiniń arasynda TsESSI-Qazaqstan salystyrmaly áleýmettik zertteýler ınstıtýty turǵyndar arasynda saýalnama uıymdastyrdy, ondaǵy basty taqyryp jańa Úkimet jumysynyń alǵashqy júz kúnine baǵa berý boldy.
18 jas jáne odan da eresek barlyǵy 1200 respondent suraldy. Suraýǵa qalalyq jáne aýyldyq turǵyndar, er adamdar men áıelder, túrli jastaǵy jáne ulttardaǵy adamdar qatysty. Suraý telefon arqyly eldiń búkil oblystary men Almaty jáne Astana qalalarynda ótkizildi.
Suraý barysynda qazaqstandyqtardyń 36 paıyzy jańa Úkimet jumysynyń alǵashqy 100 kúnin oń baǵalaıtyny anyqtaldy. Suralǵandardyń 19 paıyzy oǵan qarama-qarsy pikirlerin bildirdi. Bul rette, respondentterdiń jartysyna jýyǵy (45 paıyz) mınıstrler kabınetiniń jumysyn baǵalaýdy qıynsyndy.
«Siz Serik Ahmetovtiń Premer-Mınıstr retinde qyzmetin oń baǵalaısyz ba?» suraǵyna suralǵandardyń kóbi - 51 paıyz «ıá» dep jaýap berdi. Onymen birge, 12 paıyz bul suraqqa «joq» dep jaýap berdi, taǵy 37 paıyzy óz baǵasyn berýdi qıynsyndy.
Jańa Premer-Mınıstrge qatynasyn sıpattaı otyryp, respondetter onyń «bilikti», «jigerli», «salmaqty», «qarapaıym adamdardyń problemalaryn biletin», «senim qondyrtatyn» adam ekenin atap ótti. Alaıda, ony «tájirıbesiz», «barlyǵy sııaqty sheneýnik», «eshteńe sheshpeıtin» adam retinde baǵalaǵandar da bar.
Premer-Mınıstrdiń qyzmetine oń qaraıtyn respondetterdiń sany, suraý málimetterine sáıkes, oǵan teris qaraıtyndardyń sanynan 15 paıyzǵa kóp bolǵany qyzyqtyrady. Serik Ahmetovtiń turǵyndar arasynda belgili bir tanymaldylyqqa ıe bolyp, qandaı da bir dárejede Úkimet qyzmetinen tys qabyldanady. Munda jańa Premer-Mınıstrdiń oblystar boıynsha jasaǵan jumys saparlary ról oınaýy múmkin. Belgili bolǵandaı, Serik Ahmetov Premer-Mınıstr retinde ǵana emes, birinshi vıtse-premer qyzmetinde bolǵanda respýblıkanyń barlyq aımaqtaryna sapar jasady.
Jalpy alǵanda, qazaqstandyqtar Úkimet basshysy Serik Ahmetovtiń aldaǵy ýaqytta eldegi áleýmettik-ekonomıkalyq jaǵdaıdy jaqsartý boıynsha mindetterdi sheshý qabilettiligine teris baǵa berýden alys - suralǵandardyń arasynda onyń besinshi bóligi ǵana (21 paıyz) óziniń pessımıstik qatynasyn bildirdi. Turǵyndardyń jartysy (49 paıyz) Serik Ahmetovtiń bolashaqta áleýmettik-ekonomıkalyq mindetterdi sheshýdegi qabilettiligin optımıstik túrde baǵalaýda. Dástúr boıynsha, qatysýshylardyń úshinshi bóligi jaýap berýdi qıynsyndy.
Sońynda qazaqstandyqtar jańa mınıstrler kabınetiniń birqatar basymdyq mindetterin aıtyp ótti. Olardyń arasynda kommýnaldyq qyzmet kórsetý jáne azyq-túlik baǵalaryn tejeý, medıtsınalyq qyzmet kórsetý sapasyn arttyrý, jemqorlyqpen kúres, turǵyndardyń áleýmettik osal toptaryn qorǵaýdy kúsheıtý. Budan basqa, qazaqstandyqtardyń pikirinshe, turǵyn úı-kommýnaldyq sharýashylyq qyzmetteriniń sapasyn jaqsartý (jylý jáne sýmen qamtamasyz etý, joldar, turǵyn úılerdiń jóndelýi) basymdyq másele bolyp qalýda.
