QR zańnamasynda qarjylyq pıramıda túsinigi joq, biraq Qarjy polıtsııasy elimizdiń QK 177-shi baby boıynsha jaýapkershilikke tarta alady

 Bul týraly búgin brıfıng barysynda QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.

Onyń atap ótýinshe, sońǵy úsh jylda QR-nyń quqyq qorǵaý organdary 17 qarjylyq pıramıdanyń qyzmetine toqtaý salǵan. Olardyń is-áreketteriniń saldarynan 5 myńǵa jýyq azamatqa aıtarlyqtaı shyǵyn keltirilgen.

«MMM-2011-ge keler bolsaq, biz basynda-aq onyń qarjylyq pıramıda jáne onyń kúıreýi aqshalaı qarajat salǵan azamattarǵa aıtarlyqtaı zalal keltiretindigin aldyn ala eskertkenbiz. Alaıda QR zańnamasynda qarjylyq pıramıda túsinigi belgilenbegen jáne onyń qyzmetine tikeleı tyıym salynbaǵan. Atalǵan uıymdardyń qyzmetin biz QR QK 177-shi, ıaǵnı «alaıaqtyq» babymen saralap, qylmystyq jaýapkershilikke tarta alamyz», - dedi ol.

Resmı ókildiń sózine qaraǵanda, atalǵan uıymdy jaýapkershilikke tartý úshin azamattardan zalal keltirilgendigi týrasynda shaǵym aryz túsýi kerek. Biraq búgingi kúni qandaı da bir zalal keltirgendigi týrasynda shaǵym aıtyp, qarjy polıtsııasy organdaryna júgingen azamat joq. «Sol sebepti atalǵan uıymnyń basshylaryn ne bolmasa qatysýshylaryn qylmystyq jaýapkershilikke tartýǵa quqyqtyq negiz joq», - dedi M.Jumanbaı.