QR Vıtse-premeri mátindi túsinikti jaza almaıtyn sheneýnikter týraly aıtyp berdi
ASTANA. QazAqparat - QR Premer-Mınıstriniń orynbasary Darıǵa Nazarbaeva mátindi saýatty ári túsinikti jaza almaıtyn sheneýnikterdi synǵa aldy.
«Shynyna kelsem, memlekettik qyzmettegi jumysymda kún saıyn memlekettik organdar jiberetin túrli qujattardy oqımyn. Meniń oıymsha, mátindi saýatty jazýǵa qatysty tıisti shara qabyldaý kerek», - dep toqtaldy Úkimet basshysynyń orynbasary búgin Astanadaǵy № 81 «Astana English School» mamandandyrylǵan gımnazııasy muǵalimderimen jáne oqýshylarymen kezdesý barysynda.
Ol mán-maǵynasy joq 30 betke jalǵasqan qujattyń tek sońynda ǵana máseleniń mazmuny ashylatynyn sóz etti.
D. Nazarbaevanyń paıymynsha, bir jarym betke máseleniń toq eterin qysqa da nusqa jazyp berýdi bilý qajet.
Sonymen qatar ol qazirgi mektepter kásipkerliktiń alǵysharttaryn jáne daǵdylaryn úıretýi kerek ekenin jetkizdi.
«Ekonomıka» páni arqyly joǵary synypta oqýshylar ózderiniń bıznesin modeldeýdi, bıznes-jospardy qurýdy, bızesti qoldaý úshin memleket tarapynan usynylǵan barlyq qujattar men baǵdarlamalardy zerdeleýdi oqýy kerek. Sonymen qatar banktermen, kelisimsharttarmen jumys isteýge mashyqtanýy qajet. Búginde qarjylyq saýattylyq qajet bolyp tur», - dedi ol.
